Bótasvikasveit sparar ríkinu á fjórða hundrað milljónir

Hópur sem vinnur að því að uppræta bótasvik sparaði Vinnumálastofnun útgjöld sem nema á fjórða hundrað milljónum króna á um 3 mánaða tímabili. Tugir mála vegna ofgreiddra bóta verða sendir til innheimtu á næstu vikum.

Fjögurra manna teymi á vegum Vinnumálastofnunar var sett á laggirnar síðasta haust til að hafa eftirlit með bótasvikum. Eftirlitsdeildin á gott samstarf við Ríkisskattstjóra og fleiri opinberar stofnanir. Um 16,900 manns eru atvinnulausir í dag en bæturnar nema um 150.000 krónum á mánuði. Í heild fara því um tveir og hálfur milljarður króna í atvinnuleysisbætur hvern mánuð. Gissur Pétursson, forstjóri Vinnumálastofnunar, segir starfið hafa skilað miklum árangri og sparað ríkinu umtalsverðar fjárhæðir.

„Við höfum reiknað það út að bara frá því í október, réttara sagt frá miðjum september og fram að áramótum, þá kunnum við að hafa náð um það bil á fjórða hundrað milljóna króna í sparnað í sparnað vegna útgreiðslu atvinnuleysisbóta," segir Gissur.

Þá hefur Vinnumálastofnun fengið Sýslumanninn á Blönduósi til að sjá um innheimtustörf vegna ofgreiddra bóta sem fólk hefur fengið með sviksemi. Ofan á bæturnar leggst svo 15 prósenta álag.

Aðspurður hvað hann geri ráð fyrir að mörg mál fari þessa leið á næstu vikum svarar Gissur: „Við ætlum að byrja með um 20 mál sem hafa legið hjá okkur og eru mjög skýr svikamál og síðan mun þetta samstarf þróast eitthvað í fyllingu tímans."

Spurður hversu háar fjárhæðir um er að ræða svarar Gissur: „Þetta getur að einhverju leiti orðið samningsatriði en þetta getur skipt einhverjum hundruðum þúsunda per einstakling. Þannig að þetta tekur verulega í."

Gissur Bætir svo við: „Það getur ekkert kerfi liðið það að það sé verið að greiða út framfærslutryggingu, eins og atvinnuleysistryggingar eru, til þeirra sem ekki eiga að fá þær."