Innlent

Borgin með aðgerðaáætlun í fjármálum: Vill að gistináttaskattur renni til sveitarfélaga

Atli Ísleifsson skrifar
Björn Blöndal er formaður borgarráðs.
Björn Blöndal er formaður borgarráðs. Vísir/Hari
Borgarráð Reykjavíkurborgar samþykkti í morgun nýja aðgerðaáætlun sem miðar að því að draga úr rekstrarhalla hjá borginni.

Í áætuninni kemur meðal annars fram að viðræður skuli teknar upp við ríki og hagsmunaaðila um að gistináttagjald renni til sveitarfélaga en það rennur nú í ríkissjóð. Þá segir að gjaldskylda á rútustæði í miðborginni verði útfærð og innleidd.

Í tilkynningu frá borginni segir að borgarráð hafi áður samþykkt tillögur sem herða reglur um ábyrgð stofnana og sviða í fjármálum og tillögu um að draga úr nýráðningum með sérstakri ráðningarýni.

„Framundan er frekari vinna sem lýtur að fjárhagsáætlun næsta árs og fimm ára áætlun. Samstaða var um aðgerðirnar.

Aðgerðirnar eru eftirfarandi:

1. Sérstök eftirfylgni verði með niðurstöðum sex mánaða uppgjörs og níu mánaða uppgjörs til að draga úr halla sem flyst milli ára.

a. Borgarstjóri leggi fram endurskoðaða áætlun um lóða- og eignasölu þannig að fjárhagsáætlun ársins um sölu byggingarréttar gangi eftir.

b. Borgarstjóri beini því til allra sviða borgarinnar að hægja á/eða leggja af verkefni sem ekki er hægt að hagræða á móti, ekki eru farin af stað eða eru ekki tekjuskapandi. Dregið verði úr aðkeypti ráðgjöf eins og kostur er.

c. Sviðsstjórar geri sérstaka grein fyrir aðgerðum til að koma í veg fyrir framúrkeyrslu, þar sem í hana stefnir, og kalli eftir greinargerðum og tillögum um aðgerðir þar sem starfsstöðvar stefna fram úr fjárheimildum.

2. Unnið verði gegn svartri atvinnustarfsemi og rangri skráningu fasteigna í samvinnu við skattayfirvöld og fasteignaskrá.

3. Fjármálastjóri fundi með fjársýslu ríkisins og ríkisskattstjóra vegna skila á útsvari og skili borgarráði greinargerð um málið.

4. Ferðamannagjöld.

a. Teknar verði upp viðræður við ríki og hagsmunaaðila um að gistináttagjald renni til sveitarfélaga.

b. Sveitarfélög fái hlutdeild í virðisaukaskatti af ferðaþjónustu, auknum innflutningsgjöldum af bílaleigubílum og fjármagnstekjuskatti af leigutekjum.

c. Gjaldskylda í rútustæði í miðborginni verði útfærð og innleidd.

5. Leiðréttingar verði sóttar í ríkissjóð vegna vanfjármögnunar á málaflokki fatlaðs fólks, hjúkrunarheimilum og tónlistarskólum í samvinnu við Samband íslenskra sveitarfélaga.

6. Lögð verði fram greinargerð um lífeyrisskuldbindingar og þróun þeirra í ljósi nýgerðra kjarasamninga, breytinga á lífaldri og stöðu Lífeyrissjóðs starfsmanna Reykjavíkurborgar og Lífeyrissjóðs starfsmanna sveitarfélaga.

Aðgerðir sem samþykktar voru í borgarráði þann 1. október sl.

7. Reglur um flutning halla og afgangs innleiddar á sviðum, stofnunum og starfseiningum, sbr. ákvörðun borgarráðs sl. vor og útfærslu fjármálaskrifstofu sem staðfest hefur verið af borgarráði.

8. Ráðningarýni. Innleidd verði miðlæg ráðningarrýni sem gildi til áramóta vegna nýráðninga annarra sviða en umhverfis- og skipulagssviðs og menningar- og ferðamálasviðs, skv. sérstökum reglum.

Borgarráð mun funda áfram um frekari aðgerðir í fjármálum borgarinnar í tengslum við undirbúning fjárhagsáætlunar fyrir árið 2016 og fimm ára áætlun.

Að auki samþykkti borgarráð í morgun með einni hjásetu að skora á ríkisstjórnina að beita sér fyrir breytingum á tekjustofnum sveitarfélaga.“


Tengdar fréttir

Afkoma þriggja stærstu sveitarfélaga versnar

Afkoma stærstu sveitarfélaga landsins, það er Reykjavikurborgar, Hafnafjarðar og Kópavogs, virðist nú fara versnandi. Greiningadeild Arion banka bendir á að uppgjör síðasta árs og nýlegar tölur um afkomu þriggja stærstu sveitarfélaga landsins beri þess glöggt vitni.




Fleiri fréttir

Sjá meira


×