Björn Bergmann borinn af velli

Björn Bergmann Sigurðarson var borinn af velli í leik Wolves og West Ham á Upton Park í Lundúnum í dag. Þetta var fyrsti byrjunarliðsleikur Björns Bergmanns fyrir Wolves í háa herrans tíð.

Björn Bergmann gekk í raðir Wolves sumarið 2012 og hefur leikið 56 leiki fyrir liðið á þeim tíma. Hann hefur þó glímt við meiðsli og farið á lán til Molde og FCK í Danmörku.

Hann kom inná í sínum fyrsta leik í tvö ár á nýársdag þegar hann kom inná sem varamaður fyrir James Henry í 1-0 sigri Wolves á Brighton í ensku B-deildinni.

Skagamaðurinn var svo í byrjunarliðinu í dag, en meiddist á 56. mínútu og var borinn af velli. Samkvæmt Twitter-síðu Wolves segir að BJörn hafi meiðst á baki og sé í meðhöndlun þessa stundina.

Nikica Jelavic skoraði sigurmarkið á 84. mínútu, en West Ham er því komið áfram í fjórðu umferð keppninnar á meðan Wolves er dottið úr leik.

Benik Afobe, aðalframherji Wolves, er að ganga í raðir Bournemouth samkvæmt heimildum ytra og því eru þetta slæm tíðindi fyrir Björn sem hefði eflaust fengið fleiri tækifæri ef Afobe hyrfi á braut.

Best wishes to @officialwolves Bjorn Sigurdarson carried off after 3/4 mins treatment on the pitch pic.twitter.com/qfWrQqua2B

— Ian Abrahams (Moose) (@BroadcastMoose) January 9, 2016