Birkir kom inn í sigri

Birkir Bjarnason spilaði síðustu mínúturnar í stórsigri Aston Villa á Burton í ensku 1. deildinni í kvöld.

Birkir kom inn á á 79. mínútu, en þá var staðan 0-4 fyrir Villa, sem urðu lokatölur leiksins.

Villa var komið þremur mörkum yfir eftir 32. mínútur, og innsigluðu svo sigurinn á 71. mínútu.

Jón Daði Böðvarsson kom inn á 81. mínútu í tapi Reading gegn Millwall á útivelli.

David Edwards kom Reading yfir á 73. mínútu, en tvö mörk frá George Saville á fimm mínútna kafla tryggði Millwall sigurinn.

Reading hefur aðeins unnið tvo af fyrstu níu leikjum sínum í deildinni.

Hörður Björgvin Magnússon sat allan leikinn á bekknum þegar Bristol City sigraði Bolton 2-0 á heimavelli.

Famara Diedhiou og Aden Flint gerðu mörk Bristol sem er með 17 stig eftir 10 leiki.

Aron Einar Gunnarsson var ekki með í toppslag Cardiff og Leeds vegna meiðsla.

Cardiff fór með 3-1 sigur af hólmi og tryggði sér toppsæti deildarinnar.

Fyrirliði Leeds, Liam Cooper, fékk tvö gul spjöld undir lok fyrri hálfleiks, og var Leeds því manni færri allan seinni hálfleikinn.