Bílar

Benz afhjúpar X-Class pallbílinn

Finnur Thorlacius skrifar
Mercedes Benz X-Class Powerful Adventurer útgáfan.
Mercedes Benz X-Class Powerful Adventurer útgáfan.
Í gær svipti Mercedes Benz hulunni af bíl sem margir hafa beðið óþreyjufullir eftir. Þar er um að ræða fyrsta pallbíl Benz og hefur hann fengið nafnið X-Class, eins og búist hafði reyndar verið við. Við smíði X-Class á Mercedes Benz í samstarfi við Nissan og er hann með sama undirvagn og Nissan Navarra.

X-Class er hugsaður fyrir Evrópumarkað, S-Ameríku, Ástralíu og S-Afríku, en hann verður ekki í boði í fyrstu í Bandaríkjunum. Við kynninguna í gær sýndi Mercedes Benz tvær útgáfur X-Class, þ.e. “Powerful Adventurer” og “Stylish Explorer”.

Víst er að þessi nýi pallbíll Benz mun bæta nokkrum lúxus við þennan flokk bíla sem ekki hefur verið þekktur fyrir mikinn íburð hingað til. Lúxusbílaframleiðendur hafa ekki hingað til tekið þátt í slagnum um pallbíla, en nú myndast hinsvegar sú spurning hvort að framleiðendur eins og BMW og Audi fylgi í kjölfarið.

Sú týpa bílsins sem Benz kallar Powerful Adventurer er greinilega tilbúinn til átka og talsverðra torfæra og það læðist óneitanlega sú hugsun að hjá mörgum Íslendingnum að Benz hafi horft til Arctic Trucks útfærslu Toyota Hilux bílsins við útfærslu hans.

Mercedes Benz X-Class mun koma í sölu í enda næsta árs, svo áhugasamir verða að bíða í um eitt ár eftir þessu nýja útspili Benz.






×