Innlent

Báðu borgaryfirvöld að loka Heiðmörk

Svavar Hávarðsson skrifar
Eftirlitsmaður Veitna taldi á stuttum tíma för eftir fjórtán bíla sem ekið höfðu utan vegar á viðkvæmu vatnsverndarsvæði Heiðmerkur.
Eftirlitsmaður Veitna taldi á stuttum tíma för eftir fjórtán bíla sem ekið höfðu utan vegar á viðkvæmu vatnsverndarsvæði Heiðmerkur. Mynd/Hafsteinn Björgvinsson
Orkuveita Reykjavíkur fór fram á það við borgaryfirvöld í mars 2013 að vegum í Heiðmörk yrði lokað fyrir gegnumakstri vélknúinna farartækja. Ástæða þessarar beiðni var að tryggja vatnsvernd á svæðinu.

Bréfið, sem Inga Dóra Hrólfsdóttir, framkvæmdastjóri Veitna (dótturfyrirtækis OR), skrifaði tekur til þess að með lokuninni geti Orkuveitan betur rækt skyldur sínar gagnvart íbúum höfuðborgarinnar og „tryggt gott neysluvatn fyrir höfuðborgarbúa til langrar framtíðar“.

Eins og Fréttablaðið greindi frá í gær fara heilbrigðiseftirlitin á höfuðborgarsvæðinu þess eindregið á leit við fólk að aka ekki um vatnsverndarsvæðið í Heiðmörk í erfiðum vetrarskilyrðum eins og mynduðust eftir snjóaveðrið á sunnudag. Vegirnir eru mjög varasamir enda engin vetrarþjónusta. Ítrekuð óhöpp hafa orðið á þessu viðkvæma svæði en olíu- og efnamengun er talin ein aðalógnin við öryggi vatnsbóla.

Inga Dóra Hrólfsdóttir, framkvæmdastjóri Veitna
Öll sveitarfélögin á höfuðborgarsvæðinu sækja vatn í grunnvatnsstraumana í hraununum í Heiðmörk. Þó kemur fram í bréfinu að óljóst virðist hver eigi að sjá um vegina sem þar eru. Þeir séu ekki á vegaskrá Vegagerðarinnar og ekki sé ljóst hvort þeir séu á ábyrgð sveitarfélaganna. Hún vísar í heimild í vegalögum sem leyfir landeigendum að loka slíkum óskilgreindum vegum um jarðir sínar, þó þannig að viðkomandi sveitarstjórn verður að heimila það.

Þá lýsir hún því ófremdarástandi sem þá þegar ríki en vegirnir í Heiðmörk eru sjaldan eða ekki hreinsaðir af snjó og mikil svell og hálka myndast þegar hlánar. 

„Bílar hafa farið út af veginum og olía lekið niður en með snarræði hefur tekist að moka olíumenguðum jarðvegi í burtu,“ segir í bréfi Ingu Dóru til borgarstjórnar. Ennfremur að „starfsmenn Orkuveitu Reykjavíkur hafa oft séð för eftir bíla sem farið hafa út af veginum en þeir verið dregnir burtu án þess að óhappið hafi verið tilkynnt.“

Hólmfríður Sigurðardóttir
Eins og sagt var frá í Fréttablaðinu í gær hefur ástandið verið slæmt síðustu daga, og síst batnað frá þeim tíma sem bréfið var skrifað. Bíll fór þar á hvolf í vikunni og eftirlitsmaður Veitna á svæðinu hefur séð ummerki um fjölda óhappa, þar sem bílar hafa farið út af og einnig þar sem bílstjórar reyna á bíla sína með spóli og utanvegaakstri. 

Undanfarin misseri virðist vatnsbólunum einnig stafa aukin ógn af flugumferð. Flugvél var nauðlent í Heiðmörk í desember síðastliðnum og útsýnisflug hefur aukist yfir svæðinu.

Þegar haft var samband við OR í ljósi þeirrar fréttar sem birt var í gær sagði umhverfisstjórinn, Hólmfríður Sigurðardóttir, að allir íbúar og fyrirtæki á höfuðborgarsvæðinu fengju neysluvatn sitt úr Heiðmörk og nágrenni.

„Það er öllum mjög mikilvægt að við stöndum vörð um þau einstöku náttúrugæði sem heilnæmt og ómeðhöndlað vatn er, þannig að komandi kynslóðir geti notið þeirra,” segir Hólmfríður sem játar því að óskin um lokanir fyrir alla almenna umferð eigi enn við.

Reykjavíkurborg varð ekki við ósk Orkuveitunnar um að loka vegum í Heiðmörk, en gaf fyrirheit um tilteknar umbætur. Hverjar þær urðu hefur Fréttablaðið ekki upplýsingar um.

Fréttin birtist fyrst í Fréttablaðinu


Tengdar fréttir

Ítrekuð óhöpp sem geta ógnað vatnsvernd

Óhöpp á vatnsverndarsvæðinu í Heiðmörk eru tíð þegar mikill snjór og hálka er á svæðinu. Vanbúnir bílar og ofsaakstur eru meðal ástæðna. Hagsmunirnir sem eru undir eru gríðarlegir. Eftirlitsmaður Veitna taldi ummerki eftir 15 bíl




Fleiri fréttir

Sjá meira


×