Aukin áhersla lögð á markaðsmál

Rekstur Fánasmiðjunnar ehf., á Ísafirði gengur ágætlega að sögn Kristjönu Helgu Jónasdóttur, sem nýlega tók við starfi rekstrarstjóra af Grétari Erni Eiríkssyni. Tæpt ár er síðan Fánasmiðjan var flutt frá Þórshöfn á Langanesi til Ísafjarðar. „Við ætlum okkur að vera bjartsýn og vongóð með framhaldið og vonum að fyrirtækið haldi áfram að rísa,“ segir Kristjana. Fjórir einstaklingar starfa nú hjá fyrirtækinu en þeir voru upphaflega þrír. „Við vorum að bæta fjórða manninum við núna í febrúar. Það kom bersýnilega í ljós að til þess að geta sinnt rekstrinum og markaðsmálunum betur, þá þyrftum við að bæta við okkur auka starfsmanni, en það er hugsunin að fara að leggja meiri áherslu á markaðsmálin í komandi framtíð. Núna erum við að undirbúa okkur fyrir sumarið með því að vinna upp lagerinn, en sumarið er aðal vertíðin okkar. “

Að sögn Kristjönu er uppistaðan í framleiðslunni fánar, en í íslenskri veðráttu þarf alltaf að vera að endurnýja þá. „Núna, í kringum árshátíðir og þorrablót, hafa reyndar borðfánar verið vinsælir. Við finnum fyrir greinilegri aukningu í þeim. Þá eru inn á milli reglulegar fatamerkingar og það eru alveg ótrúlegustu hlutir sem hafa komið inn á borð til okkar.“ Vestfirska verslunin á Ísafirði hefur verið dugleg að panta bolamerkingar frá Fánasmiðjunni auk þess sem íþróttafélögin á svæðinu eru fastakúnnar. Þá var mikið að gera hjá fyrirtækinu í desember við að útbúa jólagjafir.

Kristjana segir að enn sem komið er hafi ekki verið mikið verslað í gegnum vefverslun fyrirtækisins. „Burt séð frá fánunum þá er uppistaðan í kúnnahópnum héðan, en það eru alltaf einhverjar pantanir, kannski um 1 til 2 á viku. Þá er mikið hringt og spurt alls staðar af landinu og var ég t.d. að taka við pöntun frá nemendum í Menntaskólanum á Akureyri.“

asta@bb.is