Auður Capital ávaxtar pund lífeyrissjóða

Nokkrir af helstu lífeyrissjóðum landsins settu, ásamt öðrum, fjármagn í stýringu í fagfjárfestingarsjóðnum Auði 1 hjá Auði Capital á vordögum 2008.
Sjóðurinn hefur yfir að ráða 3,2 milljörðum króna og hefur hann til þessa varið tæplega helmingi fjárhæðarinnar ýmist til kaupa á fyrirtækjum í heild sinni eða stórum hlut í þeim. Í fjárfestingar­stefnu sjóðsins kemur fram að miðað sé við að fyrirtækin hafi þriggja til fimm ára rekstrarsögu, mikla vaxtarmöguleika og séu ýmist í eigu eða undir stjórn kvenna.

Sjóðurinn keypti á vordögum 2008 þrjátíu prósenta hlut í ELM Design, sem hannar og framleiðir tískufatnað fyrir kvenfólk. Hann fór sér hægt í kringum hrunið en hefur verið á fleygiferð síðan, er nú stór á sviði innflutnings og sölu á lífrænum vörum, á fjarskiptafyrirtæki, hlut í upplýsingatæknifyrirtækjum og öryggisfyrirtæki. Segja má að óbeint styðji fyrirtækin hvert við annað.
Segja má að lífeyrissjóðirnir hafi elt eigið skott þegar Tal var boðið til sölu. Framtakssjóður Íslands, sem er í eigu lífeyrissjóða, bauð í fyrirtækið en varð að lúta í lægra haldi fyrir Auði 1, sem lífeyrissjóðir eiga hlut í.

Framtakssjóðurinn tók sömuleiðis þátt í fyrri hluta tilboðsferlis Securitas þegar félagið var boðið til sölu. Sjóðurinn dró sig úr því. Auður Capital er bundið trúnaði um bæði hvaða lífeyrissjóðir settu fé í stýringu í Auði 1 árið 2008 og hversu stóra hlutdeild þeira eiga í sjóðnum.