Átti ekki von á að verða ráðherra

Guðbjartur Hannesson, nýr heilbrigðisráðherra, tók í dag við lyklavöldum í heilbrigðisráðuneytinu úr hendi Álfheiðar Ingadóttur, sem lét af embætti heilbrigðisráðherra í dag. Hann segir sameiningu heilbrigðisráðuneytisins og félagsmálaráðuneytisins í eitt velferðarráðuneyti vera stærsta verkefni sitt í embætti. Þá sagðist hann ekki hafa átt von á því að verða ráðherra og tók því ekki jakkafötin með ofan af Akranesi í morgun að því er segir á mbl.is.

Guðbjartur var kjörinn á Alþingi fyrir Samfylkinguna í kosningum 2007 fyrir Norðvesturkjördæmi og var endurkjörinn í kosningum í fyrravor fyrir sama kjördæmi. Guðbjartur var forseti Alþingis frá 2009-2010. Hann sat í félags- og tryggingamálanefnd 2007-2009 og var kjörinn formaður 2009. Þá var hann kjörinn formaður fjárlaganefndar á síðasta ári.

Guðbjartur lauk kennaraprófi frá KÍ 1971. Hann lauk tómstundakennaraprófi frá Seminariet for Fritidspædagoger, Vanløse, í Danmörku 1978. Hann stundaði framhaldsnám í skólastjórn KHÍ 1992-1995 og lauk meistarapróf frá kennaraskóla Lundúnaháskóla árið 2005.

Frá þessu var sagt á mbl.is.

thelma@bb.is