Ásmundur Einar: Ögmundur verður ekki þægur ráðherra

„Menn eru komnir í algjört öngstræti með þessa stjórnarandstöðu innanborðs. Nú á að kippa henni inn fyrir borðstokkinn," segir Pétur Blöndal, þingmaður Sjálfstæðisflokksins.„Þegar órólega deildin er tekin inn þá er það væntanlega til þess að hún verði róleg.

Pétur var gestur Heimis Karlssonar og Kolbrúnar Björnsdóttur í þættinum Í bítið á Bylgjunni í morgun. Ásmundur Einar Daðason var þar einnig mættur til að ræða við þau um breytingar á ríkisstjórninni og mögulega evrópusambandsaðild.

Ásmundur sagðist ekki kannast við að innan þingflokks vinstri grænna væru margar deildir og því ekki um að ræða neina órólega deild þar.

Það virðist liggja fyrir að Ögmundur Jónasson sé nú á leið inn í ríkisstjórnina á ný en hann sagði af sér embætti heilbrigðisráðherra þar sem hann var á öndverðum meiði við meirihluta ríkisstjórnarinnar í Icesave-málinu.

„Ögmundur Jónasson vék úr ríkisstjórn því hann var ekki tibúinn að ganga í takt við þá niðurstöðu sem síðan hefur komið í ljós að var hárrétt ákvörðun," segir Ásmundur.

Pétur rifjaði þá upp: „Ef ég man rétt þá lá hótun á bak við þetta líka."

Ásmundur sagði að afsögn Ögmundar hafi ekki falið í sér neina hótun, aðeins árétting á því að hann væri ekki á sömu skoðun og ríkisstjórnin.
„Hann er nú að fara inn," segir Ásmundur. „Svo vel þekki ég hann að ég veit að hann hefur ekki skipt um skoðun," segir hann og er þess fullviss að ekki er verið að veita Ögmundi ráðherraembætti til að hafa hann stilltan.

Viðtal Heimis og Kollu við þá Ásmund og Pétur má hlusta á hér.