Lífið

Ásdís Rán föndraði pálmajólatré með fjölskyldunni

Lilja Katrín Gunnarsdóttir skrifar
Til vinstri má sjá pálmajólatréð en til hægri er mynd af turtildúfunum Jóhanni og Ásdísi.
Til vinstri má sjá pálmajólatréð en til hægri er mynd af turtildúfunum Jóhanni og Ásdísi. myndir/einkasafn
„Mér finnst alltaf gaman að láta hugmyndaflugið ráða og ekki endilega eltast við hefðbundna siði,“ segir glamúrfyrirsætan og athafnakonan Ásdís Rán Gunnarsdóttir. Hún ákvað að breyta til fyrir jólin og föndraði öðruvísi jólatré sem kemur í staðinn fyrir þetta hefðbundna.

„Ég fékk þessa hugmynd að skreyta pálmatrésbol sem er í stofunni hjá okkur og bar það undir krakkana sem fannst það æðisleg hugmynd. Þetta var að vísu smá meira maus en þessi venjulegu jólatré en við höfðum gaman af því,“ segir Ásdís sem lagði mikinn metnað í tréð eins og sést á myndinni hér fyrir ofan.

„Ég þakti bolinn með ljósamottu, víraði hana fasta með rauðum vír sem ég hengdi svo kúlurnar á ásamt skrauti. Ég setti svo smá grænt greni á toppinn og mixaði spýtustjörnu með lítilli seríu í. Svo vantar bara pakkana undir,“ bætir hún við en það er mikill jólafiðringur kominn í okkar manneskju.

„Ég er mikið jólabarn og elska desember,“ segir Ásdís glöð í bragði. Þetta eru fyrstu jólin sem hún eyðir með kærasta sínum, Jóhanni Wium Tómassyni, og því er fiðringurinn ekki minni.

„Það er alltaf gaman að upplifa fyrstu jólin saman og blanda nýjum hefðum saman. Kannski svoldið meira stressandi að standa sig. Hann verður vonandi ánægður með jólasteikina!“






Fleiri fréttir

Sjá meira


×