Aukið aðgengi að sálfræðimeðferð

Vísir Aðsendar greinar 26. maí 2011 07:00

Inga Hrefna Jónsdóttir

Inga Hrefna Jónsdóttir og Sóley Dröfn Davíðsdóttir skrifar:

Þörf er á breyttum áherslum við meðhöndlun geðraskana á Íslandi. Lítt hefur dregið úr tíðni þeirra þrátt fyrir að Íslendingar séu ötulli en margar þjóðir að meðhöndla þær – með lyfjum. Aðeins lítill hluti þeirra sem þjáist af kvíða og þunglyndi fær fullnægjandi meðferð og veldur þunglyndi helmingsaukningu á fjarvistum frá vinnu og er fjórða algengasta orsök örorku. Þá eru kvíðaraskanir þrálátar í eðli sínu og geta varað svo áratugum skiptir sé ekkert að gert.
Þessar afleiðingar eru samfélaginu dýrkeyptar, auk þeirra þjáninga og skerðinga á lífsgæðum sem geðraskanir valda einstaklingnum og aðstandendum hans.

Þessi staða mála er sláandi í ljósi þess að til eru gagnreynd meðferðarform sem skila góðum árangri. Mælt er með gagnreyndri sálfræðimeðferð eins og hugrænni atferlismeðferð (HAM) sem fyrsta inngripi við kvíða og þunglyndi af breskum heilbrigðisyfirvöldum (NICE) og reiknuðu Bretar það út að það myndi borga sig upp á 2-5 árum að þjálfa upp 8000 meðferðaraðila til að veita þessa meðferð þar sem færri færu á örorkubætur og auknar tekjur kæmu til með sköttum fólks sem annars væri óvinnufært. Hefur þetta gengið eftir og eru Norðmenn nú að feta í fótspor Breta. Á Íslandi er aðgengi fólks að sálfræðimeðferð hins vegar enn takmarkað þar sem heilbrigðisyfirvöld hafa ekki séð sér fært að niðurgreiða meðferð hjá sálfræðingum þó lyfjameðferð sé niðurgreidd.

Hugræn atferlismeðferð á Íslandi
Íslendingar eru framarlega í að mennta og þjálfa meðferðaraðila í HAM sem er forsenda þess að unnt sé að bæta aðgengi hérlendis að þessari meðferð. Félag um hugræna atferlismeðferð (www.ham.is), sem nú telur yfir 200 félagsmenn, hefur á undanförnum árum staðið að sérnámi í hugrænni atferlismeðferð við Endurmenntun Háskóla Íslands í samvinnu við Oxford Cognitive Therapy Centre og fer námið aftur af stað í haust. Árlega ljúka hlutfallslega helmingi fleiri meðferðaraðilar þessari sérmenntun hér á landi en á Bretlandi sem þýðir að unnt er að bæta aðgengið að þessari meðferð með minni tilkostnaði hérlendis. Það er mikil gróska í HAM á Íslandi og verður Evrópuráðstefna um hugræna atferlismeðferð haldin í Reykjavík í haust þar sem fjölmargir af færustu meðferðaraðilum heims halda vinnustofur og kynna nýjustu rannsóknir á sviðinu. Með því að gera fleiri Íslendingum kleift að nýta sér þetta meðferðarform má ná meiri árangri við meðhöndlun geðraskana og spara útgjöld þegar til lengri tíma er litið.

Til baka

Aukið aðgengi að sálfræðimeðferð

Fleiri fréttir - Aðsendar greinar

Mest lesið: Umræðan

Nýjast á Vísi

Fréttablaðið

Stöð2