Tíska og hönnun

Fékk tíu fyrir barnalínu

Herdís Björk Þórðardóttir, nýútskrifaður grafískur hönnuður, sýndi nýja barnalínu, Bimba, á vorsýningu Myndlistaskólans á Akureyri.mynd/Björn gíslason
Herdís Björk Þórðardóttir, nýútskrifaður grafískur hönnuður, sýndi nýja barnalínu, Bimba, á vorsýningu Myndlistaskólans á Akureyri.mynd/Björn gíslason
„Ég var orðin þreytt á að finna bara Disney-karaktera á veggina í barnaherbergin," segir Herdís Björk Þórðardóttir en hún sýndi vörulínu sína, sem nefnist Bimbi, á vorsýningu Myndlistaskólans á Akureyri síðastliðinn þriðjudag.

Línan inniheldur veggskreytingar, rúmföt, boli, púða, minnisbækur og tækifæriskort og húsgögn.

„Mig langaði til að gera heildstæða barnalínu, þar sem fengist fleira en veggskreytingar. Ég hannaði vörurnar fyrir börn á öllum aldri og ekki sérstaklega fyrir stelpur eða stráka," útskýrir Herdís en hún skapaði ævintýraheim, mitt á milli draums og veruleika eins og hún orðar það.

„Ég var orðin þreytt á að finna bara Disney-karaktera á veggina í barnaherbergin,“ segir Herdís Björk Þórðardóttir.
„Ég vildi ekki hafa þetta of raunverulegt en samt eru þarna tré, fuglar og hús sem hægt er að tengja við. Ég útfærði línuna bæði í heilum borðum sem eru tilbúnir á vegginn og sem staka límmiða sem hægt er að raða saman að vild og blanda saman litum en línan kemur í sex litum. Planið er svo að bæta við línuna en ég er með langan lista í huganum af vörum sem mig langar að koma í framleiðslu," segir Herdís hlæjandi.

Hún hefur enda ástæðu til að vera ánægð en Bimbi-línan tryggði henni einkunnina tíu og hvatningarverðlaun frá skólanum við útskriftina.

„Það var bæði óvænt og skemmtilegt. Nú tekur bara við vinna við að koma vörunum á markaðinn en ég er þegar komin í samband við eina verslun hér á Akureyri. Ætla svo að þreifa fyrir mér í Reykjavík líka."

Von er á Bimbivörunum í verslanir á næstunni. Vörulínuna má skoða á Facebook. mynd/herdís björk Þórðardóttir
Beðin um útskýringar á því hvaðan nafnið Bimbi sé komið upplýsir hún blaðamann að orðið þýði börn á ítölsku.

Ljóðlínan Bimbirimbirimbam komi einnig við sögu. „Það er gömul þjóðvísa sem enginn veit hver samdi. Ég lét hana hljóma í myndbandi sem ég spilaði á sýningunni og eins er hún gegnumgangandi í öllum vörunum í línunni," segir Herdís.

heida@frettabladid.is






Fleiri fréttir

Sjá meira


×