Acta óttast gjaldþrot, 300 Svíar ætla í mál við félagið

Fari svo að fjárfestingarfélagið Acta Kapitalförvalting tapi hóplögsókn 300 Svía á hendur sér blasir ekkert annað við en gjaldþrot hjá félaginu. Lögsóknin á rætur í kaupum Svíana á skuldabréfum í Lehman Brothers árið 2008, kaupum sem Kaupþing í Svíþjóð lánaði fyrir.

Í frétt um málið á vefsíðunni e24.se segir að heildarkröfur á hendur Acta ef félagið tapar hóplögsókninni myndu nema einum milljarði sænskra kr. eða tæpum 18 milljörðum kr. „Þennan milljarð eigum við ekki til," segir Geir Inge Solberg forstjóri Acta í samtali við e24.se.

Eins og áður hefur komið fram hér á visir.is hafa um 3.200 Svíar fengið tilboð frá Kaupþingi um 40% afskriftir af lánum sínum í bankanum þar í landi.

Kaupþing í Svíþjóð lánaði sparifjáreigendum þar í landi fyrir kaupum á skuldabréfum í Lehman Brothers. Voru lánin með veði í bréfunum. Heildarupphæðin á þessum lánum nemur um milljarði sænskra kr. eða tæplega 18 milljörðum kr. Umræddir Svíar fengu að jafnaði 350.000 sænskar kr. hver að láni frá Kaupþingi til þessara skuldabréfakaupa.

Kaupin á skuldabréfunum fóru fram í gegnum fjármálafyrirtækið Acta Kapitalförvalting. Í frétt um málið á vefsíðunni e24.se segir að fyrrgreindir 3.200 viðskiptavinir Acta fengu í síðasta mánuði rukkunarbréf frá norska innheimtufélaginu Lindorff um að borga lán sín.

Lindorff hafði tekið að sér að rukka inn þessi lán Kaupþings en deilt hefur verið um hver skuli greiða þau. Í dag fengu svo þessir viðskiptavinir Acta tilboð frá Kaupþingi um að þeir sleppa við að borga 40% af þessum lánum.

Þetta nýja tilboð Kaupþing fól í sér að bankinn kaupir aftur umrædd skuldabréf, sem voru grunnurinn fyrir fjárfestingum Svíana hjá Acta. Svíarnir fá 40% af nafnvirði skuldabréfanna, það er tapa 60%.

Á e24.se segir að þessu tilboði Kaupþings fylgi einn böggull skammrifi. Svíarnir verða að gefa frá sér allan rétt á lögsókn gegn Kaupþingi og Acta vegna þessara viðskipta.

Nú hafa a.m.k. 300 Svíar hafnað tilboði Kaupþings og ætla saman í hóplögsókn gegn Acta til að reyna að fá fé sitt endurheimt. Fari svo að Svíarnir vinni málið munu tæplega 3.000 landar þeirra væntanlega fylgja í kjölfarið með sömu kröfurnar.