Óútgefin bók Jónínu seld til Þýskalands

Þýska forlagið Kiepenheuer und Witsch hefur fest kaup á óútgefinni bók Jónínu Leósdóttur. Bókin kemur út í nóvember hér á landi en Þjóðverjarnir hrifust svo af handritinu að þeir ákváðu að eigna sér það strax.

Jónína hefur undanfarin þrjú ár gefið út unglingabækur en að þessu sinni fikrar hún sig upp aldursstigann. Sagan Allt fínt…en þú? segir frá því þegar höfuð fjölskyldunnar, pabbinn og afinn, missir eiginkonuna sína. Tveimur mánuðum eftir andlátið dúkkar hann upp með nýja unnustu, mun yngri. Og dætur hans tvær þurfa því bæði að takast á við sorgina og nýju kærustuna hans pabba.

Jónína er auðvitað nýkomin heim frá Færeyjum þar sem hún var ásamt eiginkonu sinni, Jóhönnu Sigurðardóttur forsætisráðherra í opinberri heimsókn. Heimsóknin vakti nokkuð mikla athygli vegna ummæla þingmannsins Jenis av Rana sem neitaði að sitja til borðs með þeim. Jónína sjálf hefur hins vegar ekkert nema gott um Færeyjar og Færeyinga að segja. „Þetta er alveg rosalega falleg eyja og Færeyingar eru alveg yndislegt fólk enda frændur okkar,“ segir Jónína sem, eins og Fréttablaðið greindi frá fyrir helgi, tók við færeysku útgáfunni af norræna smásagnasafninu Elskar mig, elskar mig ekki en hún á eimnitt titilsöguna. Jónína segir síðan stefnt að því að kynna hana á bókamessu í Gautaborg á næstunni.

Jónína kveðst ekki hafa þurft að setja sig í einhverjar sérstakar stellingar þegar hún skipti úr unglingabókum yfir í sögur af fullorðnum. „Ég hef bara alltaf haft mjög mikinn áhuga á mannlegum samskiptum, allt sem ég skrifa um fjallar um mannleg samskipti,“ segir Jónína. - fgg