Áralöng barnamisnotkun innan skátanna afhjúpuð

Svo virðist sem Kaþólska kirkjan sé ekki eina stofnunin sem hefur slæma samvisku vegna barnaníðinga innan sinna raða því lögfræðingur í Portland í Bandaríkjunum segist vera með yfir þúsund skýrslur sem greina frá barnamisnotkun innan skátanna þar í landi samkvæmt New York Post.

Atvikin voru skrásett af skátunum sjálfum þar í landi en þeir töpuðu dómsmáli og urðu því að afhenda skýrslurnar. Ástæðan er sú að lögfræðingurinn Kelly Clark hefur höfðað mál á hendur skátunum vegna manns sem var misnotaður af skátaforingja á níunda áratugnum.

Fórnalambið er 37 ára í dag.

Í skjölunum kemur meðal annars fram að skátahöfðinginn ræddi persónulega við níðinginn, sem heitir Timur Dykes. Þá játaði Timur að hafa misnotað sautján skáta. Málið var aldrei kært af skátunum, heldur komst upp um Timur síðar og var hann þá dæmdur fyrir að misnota þrjú börn.

Í kjölfarið var honum meinað að umgangast ungmenni. Það kom því á óvart, nokkrum árum eftir að hann misnotaði skjólstæðing Clarks, að lögreglan stöðvaði hann við venjubundið eftirlit, með smábíl fullann af litlum skátum á leiðinni í útilegu.

Clark sakar skátana um að hafa hylmt yfir með barnaníðingum eins og skjölin þúsund sýna meðal annars fram á. Meðal annars hafi barnaníðingar, sem voru reknir úr einu skátafélagi, farið í það næsta og haldið áfram iðju sinni.

Clark krefst 14 milljón dollara, eða um 180 milljónir króna, í skaðabætur fyrir skjólstæðing sinn.

Dómsmálið kemur upp á hundrað ára afmæli skátanna í Bandaríkjunum. Málið var þingfest fyrir dómstólum í Portlandi á miðvikudaginn síðasta.