Deila um viðræðugrundvöll

Enn hafa engir fundir verið haldnir á milli íslensku samninganefndarinnar um Icesave og Breta og Hollendinga. Steingrímur J. Sigfússon fjármálaráðherra segir að erfiðlega hafi gengið að afmarka grundvöllinn fyrir áframhaldandi viðræðum. Ekki standi á Íslendingum.

Lee Buchheit, formaður samninganefndarinnar, kom við hér á landi í gær. Hann fundaði með fulltrúum stjórnar og stjórnarandstöðu. Steingrímur segir Buchheit hafa gefið skýrslu um stöðuna og hver yrðu næstu skref af hálfu Íslendinga. Steingrímur segir sátt hafa ríkt á fundinum og það sé í höndum samninganefndarinnar hver næstu skref verði. Erfiðar hafi gengið að koma á fundi en vonast hafi verið til.

Ekki liggur enn fyrir á hvaða samningsgrundvelli viðræðum verður haldið áfram. Steingrímur segir Íslendinga helst hafa viljað halda áfram með málið þar sem frá var horfið.

„Við hefðum helst viljað að menn kæmu að borðinu og það væri allt og ekkert undir, í þeim skilningi. Það væri mætt til viðræðna án fyrirfram afmarkana í þeim efnum, en þetta hefur svolítið þvælst fyrir mönnum."

Deiluaðilar hafa verið í samskiptum þótt ekki hafi komið til funda. Steingrímur segir ýmislegt hafa truflað viðræður; fundahöld út af fjárhagsástandi ýmissa Evrópuríkja og kosningaundirbúningur í Bretlandi og Hollandi, svo dæmi séu tekin. Utanríkismálanefnd Alþingis heldur væntanlega utan til fundar við utanríkismálanefnd breska þingsins í næstu viku. - kóp