Láta Haffa Haff hljóma vel

Upptökugengið Stop Wait Go; bræðurnir Pálmi Ragnar Ásgeirsson og Ásgeir Orri Ásgeirsson, og vinur þeirra Sæþór Kristjánsson hafa mörg járn í eldinum um þessar mundir, koma meðal annars mikið við sögu á væntanlegri plötu Haffa Haff.

„Sæþór er vinur okkur bræðranna úr grunnskóla svo „we go way back", eins og maður segir," segir Pálmi, sem er fæddur 1989. Hinir eru 1990 módel. „Sæþór og Ásgeir voru í hljómsveit sem hét Kicks og gaf út nokkur lög á Netinu. Þannig fréttu Nylon-stelpurnar af okkur og þá byrjaði þetta allt. Við erum búnir að vinna með þeim síðan áður en þær komust á samninginn úti. Höfum samið og tekið upp með þeim í eitt og hálft ár núna. Þetta efni hefur verið að fá góðar viðtökur úti og núna er verið að vinna að því að koma þessum lögum út. Vonandi gerist það á þessu ári eða næsta."

Vinnan með The Charlies er bara hluti af verkefnalista Stop Wait Go. „Við erum að semja og „pródúsera" titillagið á nýju Haffa plötunni, Freak, auk flestra nýju laganna þar. Kannski verðum við með eitt, tvö lög á plötunni hans Friðriks Dórs. Við þekkjum hann úr Versló. Svo var Friðrik Ómar að hringja og hefur áhuga á að gera Gaypride-lagið í ár með okkur."

Pálmi segir ýmsa tónlistarmenn hafa haft áhrif á þá. „Max Martin og Dr. Luke og þessir gaurar hafa áhrif þegar við erum að semja og svo eru „pródúserar" eins og The-Dream, Tricky Stewart, The Clutch og sænskir gaurar sem heita Bloodshy & Avant, sem gerðu Blackout-plötuna hennar Britney Spears."

Pálmi segir samstarf Stop Wait Go ganga smurt, þeir semja og útsetja í kross. Það er framsækni í þessari deild poppsins.

„Lög eru alltaf eins, það skiptir ekki öllu máli á hvaða tíma þau eru samin," segir hann. „Hins vegar er það útsetningin og „pródúseringin" sem tekur framförum og breytist með tímanum. Það er það sem er mest spennandi við þetta núna. Allt þetta nýja sánd."

Fyrsta verkefni Stop Wait Go sem heyrist opinberlega, „Freak" með Haffa Haff, fer í spilun eftir sirka mánuð en svo ættu fleiri lög að hrúgast inn. drgunni@frettabladid.is