RÚV sjálfhætt læri það ekki á nýjustu tæknina

Það verður sjálfhætt með Ríkisútvarpið innan tíðar, fylgi stofnunin ekki tækniþróun og nái til yngra fólks, að mati menntamálaráðuneytisins. Vinna við nýjan þjónustusamning stofnunarinnar við ráðuneytið er langt komin.

Þetta er meðal þess sem menntamálaráðuneytið telur mikilvægt að komi fram í nýjum þjónustusamningi sem nú er unnið að. Ráðuneytið telur að hlutverk almannaþjónustufjölmiðla í því nýja og breytta umhverfi sem nú sé til staðar sé ekki síst að vera samnefnari þjóðarinnar, það er fjölmiðill sem allir geta notað og reyni að ná til allra.

Ef Ríkisútvarpið leggi ekki áherslu á nýtt og fjölbreytt efni fyrir nýjar miðlunarleiðir verið starfseminni sjálfhætt innan tíðar þegar núverandi notendur verða horfnir á braut.

Í núverandi samningi er ekki fjallað um hvernig skuli staðið að mótun dagskrárstefnu Ríkisútvarpsins fyrir hvert tímabil. Ráðuneytið telur mikilvægt að vinna við dagskrárstefnu fari fram í breiðum hópi fólks. Hefur þar verið nefnt svokallaða Dagskrárþing, sem væri þá einskonar þjóðfundur um dagskrá RÚV, en það sé tilvalinn vettvangur til að prófa hugmyndir um dagskrá.

Þá er talað um að í nýjum þjónustusamningi verði Ríkisútvarpinu bæði skylt að upplýsa almenning um starfsemi sína og að hlusta á sjónarmið almennings áður en veigamiklar ákvarðanir séu teknar.

Þá telur ráðuneytið einnig brýnt að RÚV efli ímynd sína sem faglegur og traustur veitandi alþjónustu á sviði útvarps í almannaþágu til allra landsmanna og lögaðila.

Einnig eru uppi hugmyndir um að bókhald Ríkisútvarpsins verði að geta svarað á fullnægjandi hátt spurningum um umfang, klukkustundarfjölda og kostnað við einstaka dagskrárliði.