Þrjú ungmenni svipt sig lífi í Hafnarfirði

Vaxandi vanlíðunar gætir í samfélaginu. Nauðsynlegt er að fólk sýni náunga sínum hlýhug, ekki síst börnum og ungmennum, segir prestur í Hafnarfjarðarkirkju. Þrjú ungmenni úr bænum hafa svipt sig lífi á árinu.

Þórhallur Heimisson, sóknarprestur í Hafnarfjarðarkirkju, segir ástandið í Hafnarfirði hafa verið mjög erfitt frá áramótum vegna þeirra voveiflegu atburða sem þar hafa orðið. Djúp sorg ríki þar en um leið ríkur samhugur.

"Ég hef komið að þessu inn í skólunum, bæði með því að tala við börnin og við foreldrana. Við erum svo með minningarstund í kirkjunni," segir Þórhallur.

Hann segir félagsmála- og skólayfirvöld auk þess hafa reynt að vinna að því að þjappa fólki saman og reyna eftir fremsta megni að draga úr vanlíðan fólks.

Hann segir að undanfarin misseri hafi orðið margföldun í kirkjusókn í Hafnarfirði sem og annars staðar, þá bæði í messu og barnastarfi.

Þórhallur segir að hann finni vel fyrir vaxandi áhyggjum fólks.

"Ég hef fundið það undanfarið ár, og kannski aldrei meira en núna, að það er sama hvar maður kemur fólk hefur mikla þörf fyrir að tjá sig um það sem leitar á hugann. Það er mikill kvíði og áhyggjur í samfélaginu. Margir ætluðu fyrst að að reyna setja undir sig hausinn og standa erfiðleikana af sér eins og sannir Íslendingar en maður finnur að fólki þykir orðið erfitt að sjá fyrir endann á vandamálunum," segir hann og segir að þar með komi vandinn smám saman meira upp á yfirborðið.

Hann hvetur fólk sem líður illa að leita sér aðstoðar, svo sem hjá vinum, sálfræðing, lækni, presti, Hjálparsíma Rauða krossins. Þá minnir hann á mikilvægi þess að fólk gefi líðan barna og unglinga gaum og reyni að styrkja þau.