Fleiri sækja í menningu en íþróttaleiki

Fleiri sækja menningar-viðburði en íþróttaviðburði og fleiri sækjast eftir umfjöllun um menningu og listir en íþróttir í fjölmiðlum. Þetta er meðal þess sem kemur fram í nýrri könnun Félagsvísindastofnunar Háskóla Íslands á menningarneyslu Íslendinga. Niðurstöður hennar voru kynntar í Þjóðminjasafni Íslands í gær.

Andrea Dofradóttir kynnti skýrsluna fyrir hönd Félagsvísindastofnunar. Könnunin var framkvæmd haustið 2009. Þátttakendur voru spurðir um þátttöku í mismundandi tegundum menningarviðburða síðastliðna tólf mánuði. Þeir voru einnig spurðir eftir hverju þeir sæktust helst í fjölmiðlum.
Eins og sjá má af töflunni til hliðar fóru flestir svarendur í bíó en yfir helmingur mætti einnig á aðra menningarviðburði. Tæp 38 prósent mættu á íþróttaviðburði, en þeir voru aftur á móti duglegri að mæta. Hlutfall þeirra sem sóttu íþróttaviðburð oftar en þrisvar á árinu var 68 prósent; aðeins í hópi kvikmyndahúsagesta var hlutfallið hærra.

Fleiri konur en karlar sækja leikhús, tónleika og listasöfn en í kvikmyndahúsum, á sögustöðum og menningarhátíðum er munurinn innan skekkjumarka. Hlutfallslega fleiri karlar en konur sækja hins vegar íþróttaviðburði, 48 prósent á móti 29.

Athygli vekur að átján prósent svarenda höfðu ekki lesið bók sér til ánægju á árinu. Hæst var hlutfallið í hópi ungmenna á aldrinum 18 til 29 ára, 30,2 prósent, en í hópi karla sem ekki höfðu lesið bók var hlutfallið litlu lægra, 27 prósent. Rúm 35 prósent svarenda fóru aldrei á bókasafn á árinu. Rétt rúmur fimmtungur svarenda fékkst hins vegar við skriftir á Netið, til dæmis á bloggi eða öðrum heimasíðum.

Úrtak könnunar var 1200 manns á aldrinum 18 til 75 ára. Alls tóku 695 þátt.
bergsteinn@frettabladid.is