Langholtshverfismálið byggt á misskilningi

Það var misskilningur sem leiddi til þess að skólastjóri sendi forráðamönnum barna í Langholtsskóla tölvupóst seinnipartinn í dag og varaði við því að eldri maður hefði reynt að lokka átta ára gamla stelpu í bíl til sín.

Í bréfi sem skólastjórinn sendi foreldrunum eftir að fyrra bréfið var sent segir skólastjórinn að fullorðinn maður hafi verið á heimleið þar sem hann átti von á barnabarni sínu eftir skóla. Hann hafi talið sig sjá stúlkuna, stöðvað bifreið sína og kallað á hana. Honum hafi fundist skrýtið að hún skyldi ekki koma til hans. Stúlkan hafi ekki þekkt manninn og hlaupið í burtu.

Skólastjórinn segir að maðurinn hafi umsvifalaust haft samband við sig þegar að hann heyrði lýsingar á málinu í fjölmiðlum. „Ég hafði umsvifalaust samband við foreldra stúlkunnar og skýrði þeim frá málavöxtum. Að því búnu heimsóttum við, ég, maðurinn og kona hans, fjölskyldu stúlkunnar og fórum yfir málið," segir Hreiðar Sigtryggsson skólastjóri í bréfinu. Málið hafi síðar verið útskýrt fyrir lögreglunni.

Hreiðar segir síðan í síðara bréfinu, sem Vísir hefur undir höndum, að eftir standi að litla stúlkan hafi brugðist hárrétt við atburðinum. Það sé rétt að fullorðna fólkið haldi áfram að uppfræða börnin um hvernig bregðast eigi við þegar ókunnugir bjóði þeim upp í bíl sinn eða reyna að lokka þau til sín á annan hátt.