Líftækni breytir fiskúrgangi í verðmæt bragðefni og súpur

Líftæknifyrirtæki á Blönduósi, sem notar fiskprótein til að framleiða bragðefni og súpur til útflutnings, fær margfalt hærra verð en áður hefur fengist fyrir íslenskar sjávarafurðir.

Húnvetningum þótti sárt þegar mjólkurstöðinni á Blönduósi var lokað í fyrra eftir meira en hálfrar aldar starfsemi. En nú er komið nýtt fyrirtæki í húsið, Grýta, sem gæti orðið enn styrkari stoð fyrir samfélagið.

Sending af humarkrafti er að fara til eins stærsta bragðefnafyrirtækis heims í Þýsklandi. Varan er afrakstur þróunarstarfs sem þeir Einar Oddur Kristjánsson alþingismaður og Steindór Haraldsson hófu í fyrirtækinu Sero á Skagaströnd fyrir ellefu árum.

Tækjum sem áður framleiddu smjör og rjóma hefur nú verið breytt og nýjum bætt inn, svo unnt sé með líftækni að vinna prótein úr humarklóm, þangi og margskyns afskurði fiskvinnslu. Þótt margir séu að framleiða prótein kveðst Steindór halda að hvergi annarsstaðar sé verið að framleiða prótein með þeim aðferðum sem þeir noti.

Steindór segir að þetta sé þekkingariðnaður, - fyrirtækið sé að fá miklu meira fyrir þessa vöru en áður hafi fengist fyrir íslenskar sjávarafurðir, þar sem þetta sé hátæknivara.

Í raun eru þetta tvær verksmiðjur, önnur framleiðir bragðefni en hin súpur fyrir veitingahús og mötuneyti. Saltinnihald þeirra er mjög lágt og fituinnihald aðeins 1,5%. "En virka þó eins og fullfeitar súpur en eru algjör hollustuvara. Þetta er mjög nýtt og mjög góð vara," segir Steindór.

Grýta hefur hlotið viðurkenningu bæði Evrópusambandsins og Matvæla- og lyfjastofnunar Bandaríkjanna. Þeir sem kaupa vörur sem þessar eru stórir súpuframleiðendur og þeir sem framleiða allskonar krafta fyrir veitingahús og matvælaiðnað, að sögn Steindórs.

Grýta er eigu Auðhumlu, samvinnufélags mjólkurframleiðenda, og Steindór sér fram á öran vöxt, svo fremi að markaðssetning verði öflug. 4-5 manns starfi nú við fyrirtækið en það aukist væntanlega verulega í vor eða haust, segir hann, og býst við að í þessu húsnæði verði þetta 10-15 manna fyrirtæki.