Sumarlokanir leikskóla lengja biðlista

Fulltrúi Samfylkingar í leikskólaráði Reykjavíkurborgar furðar sig á að meirihlutinn hyggist lengja biðlista eftir plássi enn frekar með því að spara sér að ráða afleysingafólk í sumar. Hún efast um að sparnaðurinn skili sér.

Eins og fram hefur komið eru 120 börn á biðlista eftir leikskólaplássi í Reykjavík í dag. Meirihluti borgarstjórnar ákvað að ráða ekkert sumarafleysingafólk á leikskólana nú í sumar og því verða engin ný börn tekin inn fyrr en í haust, en venjan hefur verið að börn séu tekin inn yfir sumarið eftir því sem plássin losna.

„Þetta gerir það auðvitað að verkum að mjög langur biðlisti myndast í millitíðinni," segir Oddný Sturludóttir, borgarfulltrúi Samfylkingarinnar , en hún á sæti í leikskólaráði borgarinnar.

Þetta fyrirkomulag er aftur á móti heppilegt að mati Ragnars Sæs Ragnarssonar, varaborgarfulltrúa Sjálfstæðisflokks og starfandi formanns leikskólaráðs. „Ég held að það sé mjög eðlileg og góð leið að börn taki sumarleyfi á sama tíma og starfsfólk leikskóla."

Áætlaður sparnaður af þessu eru 50 milljónir króna, en á móti kemur að fjöldi ungs fólks sem hefur fengið sumarvinnu á leikskólum þarf að leita annað, að mati Oddnýjar. „Einhvern veginn þurfum við að mæta þeim. Þannig að ég veit ekki hvort þetta sé í rauninni hagræðing sem skilar einhverju."

Í Fréttablaðinu í dag kemur fram að flokkarnir í borgarstjórn hafa á síðustu fjórum árum fengið 130 milljónir í styrki frá borginni, tæpar 30 milljónir á þessu ári sem er 60% af því sem sparast við að ráða ekki sumarstarfsfólk í leikskólana.

Oddný telur sjálfsagt mál að skoða hvort borgin lækki styrki til flokkanna í ljósi ástandsins.

„Ég get varla svarað svona spurningu og sérkennilegri. Hún er ekki svaraverð," segir Ragnar Sær aðspurður hvort hann telji að lækka eigi styrkina.