HS Orka hagnaðist um 6,8 milljarða í fyrra

Hagnaður HS Orku á síðasta ári nam 6,8 milljörðum kr. samanborið við tap að upphæð 11,7 milljörðum kr. á árinu 2008. Þegar tekið hefur verið tillit til tekna og gjalda færðra á eigið fé er afkoman í heild jákvæð um um 8,15 milljarða kr. samanborið við tap að upphæð 4,7 milljarða kr. árið áður.

Í tilkyningu segir að betri heildarafkoma stafar í meginatriðum af hækkun á álafleiðum (framtíðarvirði álsölusamninga) og lækkun gengistaps frá árinu 2008. Ársreikningur HS Orku hf var samþykktur af stjórn félagsins á stjórnarfundi félagsins sem haldinn var um helgina.

Samkvæmt ársreikningnum námu heildartekjur HS Orku hf á árinu tæpum 6,3 milljörðum kr. samanborið við 5,4 milljarða kr. árið áður. Þessa tekjuaukningu má í meginatriðum rekja til þjónustutekna frá HS Veitum hf sem byggja á verksamningi milli fyrirtækjanna. Samsvarandi aukning er þá á kostnaðarhlið fyrirtækisins. Aðrar tekjur námu 784 milljónum og skapast af sölu lands og hitaréttinda.

"Þrátt fyrir að árið hafi verið erfitt fyrir íslenskt efnahagslíf þá hefur HS Orku hf tekist að ná mjög hagstæðri rekstrarafkomu á árinu og náð að bæta eiginfjárstöðu verulega eða úr 16,3% í 35,5%," segir Júlíus Jónsson, forstjóri HS Orku hf. "Meginástæðan er hækkun álverðs og stöðugra gengi íslensku krónunnar og miklvægt að sú þróun haldi áfram".

Framleiðslu- og sölukostnaður nam 4,4 milljörðum kr. samanborið við 3,1 milljarð kr. árið áður. Aukning skapast vegna þjónustu við HS Veitur hf svo og aukningu kostnaðar við framleiðslu og sölu orkunnar. Önnur rekstrargjöld námu 499 milljónum kr. samanborið við 377 milljónir kr. á árinu 2008. Aukning annarra rekstrargjalda stafar aðallega af sérstakri afskrift þróunarkostnaðar að upphæð 142 milljónir kr.