Hæsta turni heims óvænt lokað

Lokað hefur verið fyrir gesti í hæstu byggingu heims Burj Khalifa turninum í Dubai. Engin skýring hefur verið gefin á þessari lokun.

Turninn sem er 828 metra hár var opnaður fjórða janúar síðastliðinn. Síðan hefur legið þangað slíkur straumur ferðamanna að það hefur þurft að panta aðgangsmiða marga daga fram í tímann.

Í tilkynningu frá eigandanum Emaar Properties segir aðeins að turninum hafi verið lokað vegna tæknilegera vandamála.

Húsið er 160 hæðir og þar verður blönduð byggð íbúða og fyrirtækja.