Þróun opinberra starfsmanna hér á landi á sér tæpast hliðstæðu

Að minnsta kosti níu af hverjum tíu sem misst hafa vinnuna eftir bankahrun störfuðu á almennum vinnumarkaði. Viðskiptaráð telur að mikið ójafnvægi hafi myndast á milli almenna vinnumarkaðarins og hins opinbera. Á sama tíma og störfum fækkaði á almennum vinnumarkaði fjölgaði þeim hjá ríkinu.

Meginþorri þess fólks sem hefur misst vinnuna undanfarin misseri starfaði á almennum vinnumarkaði. Frosti Ólafsson, aðstoðarforstjóri Viðskiptaráðs, segir að á sama tíma og um fjórðungur þeirra sem vinna úti starfa hjá hinu opinbera þá hafa níu af hverjum tíu sem sagt hefur verið upp starfað á almennum vinnumarkaði. Aðeins einn af hverjum tíu sem misst hefur vinnuna hefur starfað hjá ríkinu. Mikið ójafnvægi hafi því myndast á milli almenna vinnumarkaðarins og hins opinbera.

Í svari fjármálaráðherra við fyrirspurn á Alþingi í vetur má einnig sjá að opinberum starfsmönnum fjölgaði um 300 á milli áranna 2008 og 2009. Á sama tíma töpuðust yfir 10.000 störf. Frosti segir þetta dæmi um að aðlögun vinnumarkaðarins í kjölfar efnahagslægðarinnar hafi nánast eingöngu átt sér stað hjá einkaaðilum fram til þessa.

Frosti segir útgjöld til hins opinbera hafi vaxið gríðarlega á síðustu árum. Þau séu hlutfallslega hæst af því sem gerist meðal OECD-ríkjanna.
Hann bendir á að fyrir þrjátíu árum hafi útgjöldin hins vegar verið í lægri kantinum. Sú þróun sem orðið hafi á síðustu árum eigi sér tæpast hliðstæðu í heiminum. Hagstjórnin sem ríkti hér á landi á árunum 2003 til 2008 hafi einkennist af taumlausu óhófi.

Þá bendir Frosti á að laun ríkisstarfsmanna eru nú hærri að meðaltali en gerist á almennum vinnumarkaði, starfsöryggi meira og lífeyrisréttindi langtum betri og vinnutími styttri. Þessi þróun vegi verulega að eðlilegu jafnvægi milli almenns og opinbers vinnumarkaðar.