Ragnar sagði nei við Jón Gnarr

Ragnar Bragason, leikstjóri Vaktar-seríanna, sagði nei við Jón Gnarr um að taka sæti á lista Besta flokksins fyrir borgarstjórnarkosningarnar í vor. Jón segir að leikstjórinn hafi sett sér það prinsipp að taka aldrei þátt í stjórnmálum.

„Hann er svona prinsipp-maður og við þeim er erfitt að stugga," útskýrir Jón en bætir því við að Ragnar muni styðja flokkinn á bak við tjöldin þegar nær dregur kosningum. Jón ætti þó ekkert að þurfa að kvíða manneklu því fjöldi þekktra Íslendinga hefur þekkst boð um að taka sæti á listanum. Þeirra á meðal eru fóstbræðurnir Þorsteinn Guðmundsson og Sigurjón Kjartansson, Ágústa Eva Erlendsdóttir, Hugleikur Dagsson og tónlistamaðurinn Barði Jóhannsson.

Jón reiknar með því að skila öllum tilskildum gögnum til yfirkjörstjórnar á réttum tíma en kosningar verða laugardaginn 29.maí. Hann hefur þó ekki gert það upp við sig hvort sérstök kosningaskrifstofa flokksins verði opnuð en nýr vefur ætti að líta dagsins ljós um eða eftir helgi. Þá ætti jafnframt endanlegur listi að vera kominn á hreint. „Ég er kominn með kennitölu og bankareikning sem fólk getur lagt inn á til að leggja okkur lið," segir Jón enda fá nýjar stjórnmálahreyfingar engan pening frá hinu opinbera fyrr en þær eru komnar með kjörna fulltrúa. Jón er bjartsýnn á að flokkurinn muni ná góðu gengi í borgarstjórnarkosningunum en hann lítur á þær sem einhvers konar generalprufu fyrir alþingiskosningarnar. „Stefna Besta flokksins er ekkert leyndarmál, hún er að koma manni inn á þing."- fgg