Hefur ekki borist svar frá KSÍ varðandi kampavínsmálið

Katrín Jakobsdóttir, menntamálaráðherra, telur mikilvægt að Knattspyrnusamband Íslands setji reglur um framferði fulltrúa sambandsins erlendis og hér á landi. Hún er ekki búin að fá formlegt svar frá Knattspyrnusambandinu varðandi kampavínsmálið svokallaða.

Stjórn Knattspyrnusambands Íslands ákvað á fundi sínum í gær að ekkert verði aðhafst í máli Pálma Jónssonar, fjármálastjóra sambandsins, vegna eyðslu hans upp á þrjár milljónir króna á þáverandi gengi á nektarstað í Sviss árið 2005. Stjórnin telur ekki tilefni til að bregðast frekar við þessu máli þar sem Pálmi hafi verið áminntur og hlotið refsingu sem þótt hæfileg á sínum tíma. Hann mun því starfa áfram hjá KSÍ. Skipaður verður starfshópur til að setja nýjar siðareglur fyrir sambandið.

„Ég er reyndar ekki búinn að fá formlegt svar frá KSÍ. Ég er bara búinn að sjá þá yfirlýsingu sem birtist í fjölmiðlum í gær og ég bíð eftir hinu formlega svari," sagði Katrín að loknum ríkisstjórnarfundi í morgun.

„Ég vil bara segja það að ég held að sumu leyti sé það mikilvægt sem kom fram í þessari yfirlýsingu að KSÍ ætli að móta sér reglur um framferði fulltrúa KSÍ bæði erlendis og hérlendis. Ég held þetta sé eitthvað við þurfum líka að ræða almennt í íþróttahreyfingunni," sagði Katrín.