Rukkar 20 þúsund fyrir samfarir

Kaup nokkurra karlmanna á vændi eru til rannsóknar hjá lögreglu en enginn hefur enn verið ákærður þótt hálft ár sé liðið frá því að vændiskaup voru bönnuð með lögum. Kolbrún Halldórsdóttir, ein þeirra sem barðist fyrir lagasetningunni, gagnrýnir lögreglu fyrir að setja vændiskaup ekki framar í forgangsröðina.

Breytingar voru gerðar á almennum hegningarlögum í apríl á þessu ári. Með þeim var gert refsivert að kaupa vændi en slíkt getur varðað sektum eða eins árs fangelsi. Þá er einnig ólöglegt að auglýsa vændi en fyrir það geta menn fengið 6 mánaða fangelsi.

Þrátt fyrir að auglýsingar séu bannaðar eru dagblöðin full af auglýsingum um vændi. Það er reyndar markaðssett sem líkamsnudd en þó með fullkominni þjónustu. Fréttastofan fékk mann til að hringja í eitt þessara númera sem auglýst eru og spyrja hvað væri í boði.

Í samtali þeirra kom fram að konan rukkaði 20 þúsund krónur fyrir kynmök og 15 þúsund fyrir munnmök.

Maðurinn pantaði tíma og var ákveðið að hann myndi mæta í Skipholtið, þaðan sem konan starfar, klukkan þrjú. Þegar þangað var komið opnaði hún útidyrnar en varð vör við að fleiri væru með í för. Hún neitaði því að opna dyrnar að íbúðinni.

Fréttamaður ræddi við hana í síma. Hún sagðist starfa á eigin vegum. Saga hennar er þó fremur ótrúverðug þar sem hún segist búa á Kúbu en koma hingað til lands tvær vikur í senn til að læra íslensku. Vændið sé til að framfleyta henni - en hún tekur á móti allt að þremur viðskiptavinum á dag. Það skal tekið fram að ekki er ólöglegt að stunda vændi hér á landi.

Nú hálfu ári eftir að lögin voru samþykkt sem gerðu kaup á vændi refsiverð hefur enginn karlmaður og engin kona verið ákærð fyrir slíkt brot. Þó er ljóst að vændi er stundað á Íslandi. Friðrik Smári Björgvinsson, yfirlögregluþjónn, sagði í samtali við fréttastofu að slík mál væru þó til rannsóknar.



Kolbrún Halldórsdóttir, fyrrverandi ráðherra, er meðal þeirra sem barist hefur hvað mest gegn vændi á Íslandi. Hún bendir á að samþykkt hafi verið síðastliðið vor aðgerðaráætlun gegn mansali en þar er skýrt kveðið á um að það þurfi að vinna gegn eftirspurn eftir vændi.

„Að mínu mati hefur lögreglan ekki haft þessi mál hafi í forgangi hingað til og það þarf sennilega dálítið meira til heldur en þessa aðgerðaáætlun að það breytist. Það verður auðvitað að taka afgerandi ákvörðun um það innan lögreglunnar að þetta verði meðal forgangsmála," segir Kolbrún.