Bóthildur slær í gegn

Heimilisbókhaldið Bóthildur er nú farið að streyma inn á heimili landsmanna, en Súðavíkurhreppur færði öllum íbúum sveitarfélagsins forritið að gjöf fyrir skemmstu. Nokkur sveitarfélög hafa nú fengið Bóthildi til að dreifa frítt til sinna íbúa en einnig keypti Rafiðnaðarsambandið 600 stykki til að gefa sínum viðskiptavinum. Jafnframt eru fleiri sveitarfélög, bankar og stofnanir ýmiskonar að skoða það að koma Bóthildi til sinna skjólstæðinga/viðskiptavina. „Þetta hefur farið langt framar vonum og bara mjög gaman að því“, segir Þorsteinn Örn Gestsson hönnuður Bóthildar.

Í athugasemdum frá þeim sem eru byrjaðir að nota kerfið kemur fram að það virkar vel og margir tala um að það sé farið að skila sér í hagkvæmari rekstri heimilanna. „Ég hef fengið mikið af fyrirspurnum og mikið af hrósum. Ég hef ekki heyrt neitt neikvætt um forritið“, segir Þorsteinn Örn. Aðspurður segir hann hugmyndina að Bóthildi hafa vaknað yfir kaffibolla einn daginn. „Ég var nýbúinn að gera heimilisbókhald fyrir sjálfan mig og þá datt mér þetta í hug. Síðan hefur þetta hlaðið utan á sig.“

Forritið er í Windows umhverfi, er faglega upp sett og er haft að leiðarljósi að það sé auðvelt að læra á það og nota. Markmiðið með notkun kerfisins er að vera meðvitaður um útgjöld heimilisins og lækka þau útgjöld sem hægt er að lækka.

thelma@bb.is