Pétur hefur áhyggjur af vaxtagreiðslunum

Þeir vextir sem Íslendingar eru að greiða af Icesave lánunum eru allt of háir, enda miðaðir við vexti ríkja til einkafyrirtækja, segir Pétur Blöndal þingmaður Sjálfstæðisflokksins.

Bresk stjórnvöld munu hagnast um meira en einn milljarð evra á Icesave samningnum við Íslendinga og Hollendingar munu hagnast um hálfan milljarð. Þetta er niðurstaða hagfræðidoktoranna Daniel Gros og Cinzia Alcidi hjá Centre for European Policy Studie í Brüssel í áliti, sem vefmiðillinn Pressan hefur undir höndum. Ástæðan fyrir þessum gríðarlega hagnaði stórveldanna vegna Icesave er sú, að ríkisstjórnir Bretlands og Hollands lána Íslendingum fyrir Icesave á miklu hærri vöxtum en þær fjármagna sig á.

„Ég held að ég hafi bent þetta í ræðu einhvern tímann í sumar. Þessir vextir, 5,5%, eru náttúrlega allt of háir enda eru þeir miðaðir við vexti ríkja til einkafyrirtækja. Það er að segja, breska ríkið má ekki lána til einkafyrirtækja með lægri vöxtum en þessum vöxtum sem miðað er við án þess að brjóta samkeppnislög," segir Pétur. Hann segir að síðan hafi verið bætt ofan á þessa vexti einu og hálfu prósenti. „Þannig að íslenska ríkið er að greiða álag ofan á vexti sem einkafyrirtæki eru að borga úti í heimi. Þannig að þetta er alveg með ólíkindum," segir Pétur.

Skilur ekkert í samninganefndinni

Pétur segist ekki skilja neitt í samninganefnd Íslendinga að hafa samþykkt að greiða þessa vexti. Þeir séu hærri en þeir sem breska ríkið fjármagni sig á, auk þess sem Bretar og Hollendingar hefðu mátt koma til móts við Íslendinga með lægri vöxtum vegna þess vafa sem leiki á því hvort Íslendingar eigi að greiða kröfuna. „Svo kemur náttúrlega í ljós að vextirnir eru meginþunginn af greiðslunum og nú er ríkisstjórnin búin að lúffa í því að láta þjóðina borga vexti alveg sama hvað á dynur," segir Pétur. Þetta sé sá hluti samkomulagsins sem hann hafi hvað mestar áhyggjur af.

„Auðvitað getur verið að þetta gangi allt saman ljómandi vel upp. Nákvæmlega eins og er með húsið mitt. Ég er búinn að horfa á það 40 ár aftur í tímann og það hefur aldrei brunnið húsið sem ég hef búið í, en ég hef nú samt verið tryggður allan tímann. Og ef það hefði brunnið þá hefði ég verð illa settur ef ég hefði ekki verið tryggður. Það er þetta sem fyrirvaranir ganga út á. Það er að tryggja þjóðina fyrir áföllum eins og því ef enginn hagvöxtur verði í tíu til fimmtán ár. Þá munum við ekki getað borgað neitt en eigum að borga himinháa vexti engu að síður," segir Pétur.