Innlent

Verð á bókum hækkar um 10 til 15 prósent

Að sögn bókaútgefenda hækkaði bókaverð ekki í fyrra þrátt fyrir uppsafnaða hækkunarþörf. Ekki hafi verið komist hjá verðhækkunum í ár.
Fréttablaðið/valli
Að sögn bókaútgefenda hækkaði bókaverð ekki í fyrra þrátt fyrir uppsafnaða hækkunarþörf. Ekki hafi verið komist hjá verðhækkunum í ár. Fréttablaðið/valli

Forlagið er stærsta bókaútgáfan á Íslandi og gefur um 200 titla út á árinu. Egill Örn Jóhannsson, framkvæmdastjóri Forlagsins, segir að þrátt fyrir að bókaverð hjá þeim hækki á milli ára sé sú hækkun minni en almenn verðlagsþróun á Íslandi. „Í fyrra hækkaði verðið ekki neitt, þrátt fyrir uppsafnaða hækkunarþörf og aukinn kostnað,“ segir Egill.

„Hjá Forlaginu gerum við ekki ráð fyrir að verðið hækki um meira en tíu til fimmtán prósent á milli ára, sem er undir almennum verðhækkum. Mér sýnist að heildsöluverð á skáldsögum geti því orðið rúmar 5000 krónur.“

Forlagið gefur út færri titla í ár en í fyrra en Egill á þó ekki endilega von á samdrætti í bóksölu. „Það sem af er ári hefur markaðurinn verið afskaplega góður. Bókin er tísku, ef svo má segja, eins og nýafstaðinn lagermarkaður Forlagsins er til vitnis um. Þar seldum við fleiri bækur en nokkru sinni í sex ára sögu markaðarins. Við erum því bjartsýn fyrir jólin í ár.“

Guðrún Vilmundardóttir hjá Bjarti-Veröld býst við að verðhækkanir á þeirra bókum verði einnig á bilinu tíu til fimmtán prósent. „Bókaverð hefur ekki fylgt almennri verðlagsþróun undanfarin ár heldur nánast staðið í stað,“ segir hún.

„Bókin hefur því orðið hlutfallslega ódýrari með hverju árinu. Með gengishruninu snarhækkaði hins vegar kostnaðurinn, aðallega pappírsverðið. Þær hækkanir hefðu að einhverju leyti átt að koma inn í verðið í fyrra en við ákváðum að halda aftur af verðhækkunum eins lengi og við gætum.“ Kostnaðarhækkunin verði hins vegar ekki flúin lengur.

„Við fylgjum ekki almennri verðþróun heldur er þetta allra nauðsynlegasta hækkun á verði. Bókaútgefendur eru ekki að fá sömu framlegð og fyrir tíu árum.“ Sem dæmi um algengt verð á skáldsögu fyrir þessi jól nefnir Guðrún Harm englanna eftir Jón Kalman Stefánsson; leiðbeinandi verð á henni er 5.680 krónur.

Þrátt fyrir samdráttarskeið ætlar Bjartur ekki að rifa seglin í útgáfunni og koma ívið fleiri titlar út á vegum útgáfunnar í ár en í fyrra. „Bóksala hefur gengið vel undanfarið ár og við förum því kokhraust í jólavertíðina í ár.“

bergsteinn@frettabladid.is

Egill örn jóhannsson

Tengdar fréttir

Opið bréf til heilbrigðisráðherra

Mikið hefur verið fundað í Heilbrigðisráðuneytinu um starfsemi Kragasjúkrahúsanna frá því haustið 2008. Til að gera langa sögu stutta ákvað nefnd á vegum Guðlaugs Þ. Þórðarsonar fyrrum heilbrigðisráðherra að loka skurðdeild St. Jósefsspítala Hafnarfirði, flytja átti hluta starfseminnar til Keflavíkur. Mikil mótmæli urðu við þeirri ákvörðun.



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×