Skagamenn steinlágu fyrir FH

Skagamenn fengu skell á laugardagmorgun þegar Íslandsmeistarar FH komu í heimsókn í Akraneshöllina. FH-ingar sigruðu 7:2, en meistararnir  komust í 0:3 fljótlega í leiknum og staðan í hálfleik var 1:5. Mörk Skagamanna skoruðu Jón Vilhelm Ákason og Guðjón Heiðar Sveinsson. Hjá FH-ingum skoruðu þeir sitthvora þrennuna Matthías Vilhjálmsson og nýliðinn Brynjar Benediktsson og Tryggvi Guðmundsson gerði eitt mark.

„Þetta var veruleg áminning fyrir okkur. Við vorum auðvitað að leika gegn sterkasta liðinu á Íslandi og þótt skellurinn hafi verið stór, er margt sem strákarnir geta lært af þessum leik. Það var slæmt að horfa upp á að flest mörkin sem FH skoraði komu eftir að við misstum frá okkur boltann á miðjunni og þeir brunuðu fram og skoruðu," sagði Bjarki Gunnlaugsson annar þjálfara Skagamanna eftir leikinn.

Bjarki sagði ÍA-liðið stefna að því að standa sig mun betur á móti FH-ingum þegar liðin mætast að nýju í Deildarbikarkeppni KSÍ  20. febrúar n.k.