Ætlar að kæra lögreglu fyrir ofbeldi

„Ég hef hugsað mér að kæra þessa konu. Hún er ekki starfi sínu vaxin," segir Páll Hilmarsson ljósmyndari. „En ef hún er það, þá er eitthvað að verklagsreglum lögreglunnar."

Páll stóð og tók myndir fyrir neðan grindverk í alþingisgarðinum. Hann segist hafa séð fjær sér hvar komi til orðaskipta milli lögreglu og mótmælenda í um þriggja metra fjarlægð, eftir að stúlka kastaði mold úr garðinum í átt að lögreglu.

Ljóshærð lögreglukona hafi þá gengið tæpa tvo metra í burt frá grindverkinu og að veggnum. Hún hafi tekið upp táragasbrúsa og gengið orðlaust að grindverkinu aftur og sprautað yfir mótmælendur. Að því loknu hafi hún snúið aftur að veggnum og staldrað þar við. Þá gengið í suðurátt, að Páli og fyrirvaralaust sprautað á mann við hlið hans. Þvínæst hafi henni orðið litið á Pál og séð að hann væri að taka myndir. Hún hafi sprautað beint á Pál.

„Hún gaf ekkert til kynna um hvað væri í vændum. Sagði ekki orð. Það er ekki hægt að segja að hún hafi verið að vernda hvorki sig, mig né aðra," segir Páll.

Spurður um þetta, segist Stefán Eiríksson lögreglustjóri ekki geta svarað fyrir öll atvik dagsins, en vísar þeim sem telja lögreglu hafa gengið of langt á kæruleiðir. - kóþ