Þunglynd þjóð

Það eru yfir 30 þúsund Íslendingar á þunglyndislyfjum sem kosta þjóðarbúið á annan milljarð króna á ári. Þunglyndislyfjunum var hampað mjög þegar þau komu fyrst á markaðinn. Uppá síðkastið hafa aftur á móti hlaðist upp vísbendingar um að þau geri mun minna gagn en áður og séu jafnvel hættuleg tilteknum hópum. Nú þegar kreppir að í efnahag og andlegri líðan þjóðarinnar getur hún ekki lengur lagt traust sitt á töfralausn í pilluformi.

Stóru lyfjafyrirtækin hafa rakað inn ofurgróða með nýju þunglyndislyfjunum sem þóttu marka tímamót í meðferð. Þau þóttu skila miklum árangri og hafa takmarkaðar neikvæðar hliðar. Nú er aftur á móti að koma í ljós að fyrirtækin létu hjá líða að birta óhagstæðar rannsóknarniðurstöður. Þegar tekið er tillit til þeirra kemur í ljós að afar takmarkaður ávinningur af þessum lyfjum - ef nokkur.

Í Finnlandi eru menn að súpa seyðið af því í dag að hafa skorið niður í geðheilbrigðisþjónustu á tímum bankakreppu á síðasta áratug. Gífurleg aukning er á örorku vegna geðrænna vandamála hjá fólki undir þrítugu en þetta er fólkið sem upplifði bankakreppuna sem börn. Geðlæknar og sálfræðingar eru sammála um að alls ekki megi spara í geðheilbrigðisþjónustu og nauðsynlegt sé að horfa til nýrra leiða og hverfa frá ofurtrú á lyfjum.