Finnur búinn að skipta um skoðun?

Finnur Sveinbjörnsson nýráðinn forstjóri Nýja Kaupþings, sagði í fréttum Stöðvar 2 í kvöld, ekki getað lofað því að hægt verði að borga þeim sem sagt verður upp þriggja mánaða uppsagnarfrest. Finnur gegndi áður starfi formanns skilanefndar Kaupþings. Í bréfi sem starfsmannastjóri bankans sendi starfsfólki fyrir hönd skilanefndar þann 11. október síðastliðinn segir að nefndin geri skýra kröfu um að staðið verði við ákvæði í ráðningarsamningi starfsmanna. Þar með talið á launum á uppsagnarfresti, ef til uppsagna kemur.

Í viðtali við Stöð 2 í kvöld sagðist Finnur hins vegar ekki geta lofað því að þriggja mánaða uppsagnafrestur fáist greiddur. Hann sagði að verið væri að finna ásættanlega niðurstöðu fyrir alla í málinu.

Tölvupósturinn sem starfsmannastjóri Kaupþings sendi fyrir hönd skilanefndar fer hér á eftir:

Kæra samstarfsfólk

Vegna óvissu um framtíðarskipulag bankans og óljóss fréttaflutnings varðandi önnur fjármálafyrirtæki, þá vill skilanefnd bankans koma eftirfarandi skilaboðum til starfsmanna. Skilanefndin mun gera skýra kröfu um að staðið verði við ákvæði í ráðningarsamningum starfsmanna um greiðslu á öllum launum, þar með talið á launum á uppsagnarfresti, ef til uppsagna kemur. Stefnt er að því að nýtt skipulag bankans liggi fyrir á næstu dögum.
Þá vill nefndin koma á framfæri miklu þakklæti til starfsmanna bankans fyrir þá ósérhlífni, ábyrgð og metnað sem fólk hefur sýnt í starfi á síðustu dögum og vikum. Gildir það jafnt um þau verkefni sem unnið hafa verið fyrir skilanefndina, dagleg verkefni sem og um þjónustu við viðskiptavini bankans sem innt hefur verið af hendi af yfirvegun og fagmennsku.