Mjólkandi mæður tóku þátt í fjöldagjöf

Á annan tug mæðra komu saman í Edinborgarhúsinu á Ísafirði í gær til að vekja athygli á mikilvægi brjóstagjafar. Uppátækið var í tilefni af alþjóðlegri brjóstagjafaviku sem nú stendur yfir. „Ég er alveg rosalega ánægð með mömmurnar, að svona margar hafi mætt, sérstaklega miðað við það að þetta var bara ákveðið í hádeginu í gær“, segir Guðný Stefanía Stefánsdóttir sem stóð fyrir uppátækinu. Alþjóðlega brjóstagjafavikan er haldin hátíðleg á Íslandi dagana 6.-12. október en eins og áður sagði snýst hún um að vekja athygli á mikilvægi brjóstagjafar. „Móðurmjólkin er það besta sem við getum gefið börnunum okkar“, segir Guðný Stefanía.

Þemað í ár er stuðningur. Á vef brjóstagjafavikunnar segir að stuðningur við mjólkandi móður er mikilvægur frá upphafi til enda brjóstagjafar. „Í anda Ólympíuleikanna köllum við eftir stuðningi við konur til þess að þær geti haft börn sín á brjósti. Íþróttamenn þurfa stuðning og hvatningu frá umhverfi sínu til þess að ná árangri og því er eins farið með mæður með börn á brjósti.“

Þess má geta að alþjóðaheilbrigðisstofnunin mælir með því að brjóstamjólk sé eina fæðan til sex mánaða og síðan með annarri fæðu til tveggja ára eða lengur.

thelma@bb.is