Frá Barcelona til Ísafjarðar

„Við erum að koma heim um miðjan júlí,“ segir Þórarinn Leifsson rithöfundur sem hyggst búa á Ísafirði fram að áramótum ásamt konu sinni Auði Jónsdóttur. Þau eru búsett í Barcelona. „Það verður of heitt hérna í júlí. Heilinn hættir bara að virka í þessum hita,“ segir Þórarinn. Auður er að leggja lokahönd á bókina Vetrarsól sem kemur út í haust og ætlar að klára að skrifa hana fyrir vestan. Þórarinn ætlar að klára handrit sem hann ætlar að selja í forlag í haust.

„Við vinnum þannig vinnu að við getum búið hvar sem er,“ segir Þórarinn en þau hafa reyna að haga málum þannig að þau búi hálft ár á Íslandi og hálft ár erlendis. „Ég var ekkert spenntur fyrir því að fara heim í sumar því ég vildi ekki vera í Reykjavík. Þegar Auja stakk upp á að fara á Ísafjörð leist mér strax betur á þetta. Ég er nefnilega með allskonar rómantískar hugmyndir um sveitina," segir hann.

Auður ætlar að halda námskeið í ritlist á Ísafirði í september og jafnvel fara með námskeiðið til Reykjavíkur. Þau stefna að því að fara aftur til Spánar kringum 20.desember með viðkomu í Danmörku og Þýskalandi. Þórarinn segir að það sé ofan á þá náttúrufegurð sem þau fá ókeypis á Vestfjörðum, þá sé einnig mun ódýrara að lifa þar. „Meðan Evran er að láta svona þá er réttast að við búum í tjaldi þangað til krónan styrkist. Verðum í útilegu þangað til," segir Þórarinn sem ætlar að njóta lífsins fyrir vestan. „Ég ætla að fara í göngur og veiða fisk í soðið. Auður ætlar að baka pönnukökur.“