Erlendur fjárfestir kaupir fyrir 5,6 milljarða í Alfesca

Stjórn Alfesca hefur tilkynnt að náðst hafi samkomulag við sterkan erlendan fjárfesti um að hann kaupi nýtt hlutafé í félaginu að verðmæti 5,6 milljarða íslenskra króna og eignist þar með 12,6% hlut í félaginu.

Alfesca sendi frá sér svohljóðandi tilkynningu til Kauphallarinnar í kvöld:

Stjórn Alfesca er það sönn ánægja að tilkynna að undirrituð hefur verið
viljayfirlýsing um að erlendur fjárfestir muni fjárfesta fyrir 48.3 milljónir
evra í nýju hlutafé í félaginu. Þessi fjárfesting innsiglar þær nánu og
uppbyggilegu viðræður sem hafa átt sér stað á milli Alfesca annars vegar og
hins væntanlega hluthafa hins vegar um nokkra hríð.

Vilji aðila stendur til að fjárfestingin verði með þeim hætti að keypt verða í
áskrift 850,000,000 nýrra hluta sem hver er að nafnverði ein íslensk króna, og er áskriftarverðið á genginu 6,45 fyrir hvern hlut, sem felur í sér 6,9%
afslátt miðað við gengi hluta í Alfesca við lok viðskipta föstudaginn 23. maí
2008. Um er að ræða, ef til kemur, 12,6% af heildarhlutafé Alfesca.

Í kjölfar þess að nýlega voru samþykkt á Alþingi lög um breytingu á lögum um tekjuskatt, sem m.a. fela það í sér við ákveðnar aðstæður að felld er niður skattlagning söluhagnaðar hlutabréfa, þá mun fjárfestirinn hafa uppi áform um að stofna eignarhaldsfélag hér á landi sem mun halda utan um hlutafjáreignina í Alfesca.

Alfesca býr vel að því að hafa sterkan efnahagsreikning og var
eiginfjárhlutfall félagsins 47,4% 31. mars sl. Þegar við bætist nýtt fjármagn
með þessu nýja hlutafé er ljóst að Alfesca er vel í stakk búið til að þróa
félagið áfram og skoða tækifæri til að taka yfir önnur fyrirtæki, þrátt fyrir
að aðstæður á markaði séu almennt erfiðar.

Vonir standa til að gengið verði frá þessari fjárfestingu innan fárra vikna.