Leynihvelfing á Kili

Leynileg skilaboð, dulkóðaðir lyklar í listaverkaperlum DaVinci, Botticelli og annara meistara hafa orðið mörgum mönnum yrkisefni í skáldverkum og er þeirra þekktast líklegast bók Dan Brown, Da Vinci lykillinn. En aðrir hafa á sama tíma nálgast þetta efni á forsendum fræðimennsku og talið sig geta með þeim hætti opnað dyr að nýrri þekkingu. Við segjum frá hópi manna, með Ítala í broddi fylkingar sem árum saman hefur unnið að rannsóknum sem eiga að leiða í ljós að meistarar miðalda duldu í verkum sínum frásögu um leyniför og falda helgidóma í leynihvelfingu á íslensku miðhálendi.

Síðustu fjögur ár hafa verið farnir árlegir leiðangrar uppá Kjöl af hópi manna til að leita vísbendinga um tilvist hvelfingar sem á er vísað í ljóðum Dante, og málverkum Botichelli og Leonardo DaVinci. Það hefur ekki farið hátt um þessa leiðangra þó þyrlur hafi verið notaðar og vísindalegum mælitækjum beitt. Á bak við þessa leiðangra er þrotlaus yfirlega yfir heimildum og leit að lyklum leyndardómanna.