Völdu blondínuna með stærstu brjóstin

Hávísindaleg rannsókn hefur leitt í ljós að karlmenn vilja fallegar konur. Sjálfsagt hefur marga karlmenn grunað þetta, en rannsóknin leiddi allavega í ljós hversu hræsnisfullir þeir eru við val á maka. Konurnar voru hinsvegar með það alveg á hreinu hvað útlit þeirra skiptir miklu máli. Rannsóknin fór þannig fram að hópur karla og kvenna tók þátt í hraðstefnumóti.

Fólkið hittist við borð í stórum sal og fékk að tala saman í þrjár til sjö mínútur. Svo var skipt um borð og talað við aðra. Á eftir valdi fólkið svo þann úr hópnum sem hann eða hún vildi gjarnan hitta aftur. Fyrir þessi stefnumót svaraði fólkið hinsvegar spurningalista þar sem það tíundaði hvað það vildi helst sjá í hugsanlegum maka.

Karlmennirnir höfðu uppi mikinn fagurgala um sjálfstæði, gáfur, útlit, heilsufar og aðra kosti sem þeir vildu að prýddu konur. Eftir hraðstefnumótið völdu þeir hinsvegar undantekningalaust blondínuna með stærstu brjóstin.

Hvað konurnar varðar kom í ljós að þær vissu allt um hvað karlmenn í raun og veru vilja. Því fallegri sem þær voru þeim mun meiri kröfur gerðu þær þegar þær svöruðu spurningalistanum góða.