Daðar Íslands stofna hagsmunafélag

Nýstofnað hagsmunafélag íslenskra Daða er ein nýjasta viðbótin í síbreytilega Myspace-flóruna. Á vinalista félagsins má nú þegar finna tæplega þrjátíu Daða, og frá því að síðan fór í loftið í síðustu viku hefur hún verið heimsótt yfir 3.000 sinnum, að sögn forsvarsmannsins Daða Rúnars Péturssonar. „Við samþykkjum bara Daða sem vini á síðunni, fyrir utan Arnþór Jón Þorvarðsson, sem er guðfaðir samtakanna," sagði Daði Rúnar.

Markmið félagsins eru misalvarleg, en á meðal þeirra er að stuðla að betri kjörum allra Daða. „Aðalbaráttumálið okkar er samt að við heitum ekki Davíð. Við höfum allir lent í þeim misskilningi, og ég persónulega bara síðast núna á sunnudaginn," sagði Daði Rúnar, sem segir Döðum finnast á sér brotið. „Það eru líka miklar umræður um þetta í gangi á síðunni núna," benti hann á.

Samkvæmt tölum frá Hagstofu Íslands, sem miðast við 31. desember 2004, bera 267 drengir á Íslandi nafnið Daði sem eiginnafn. Sé miðað við þær tölur hefur félagið á fyrstu starfsdögum sínum náð um 10% allra Daða á sitt band. Daði Rúnar var að vonum ánægður með árangurinn, en setur markið enn hærra. „Myspace er frekar þöngur hópur, svo við ætlum að stofna aðra heimasíðu. Þá ætlum við að hringja í alla Daða landsins og fá þá til að skrá sig," sagði hann.