HM-hjónin sáu fram á dapran endi

Sigur íslenska landsliðsins yfir Evrópumeisturum Frakka á mánudagskvöldinu hefur haft mikil áhrif á íslensku þjóðarsálina sem vart ræðir um annað. Fjölmargir er á leiðinni út til Þýskalands.
„Það er mikil eftirspurn eftir miðum.

Við eigum á flesta leiki liðsins í milliriðlunum nema gegn gestgjöfunum Þjóðverjum á sunnudeginum," segir Einar Þorvarðarsson, framkvæmdarstjóri HSÍ, sem staðið hefur í ströngu eftir að Íslendingar tryggðu sér sæti í milliriðlum eftir frækin sigur á Frökkum.

Stefán og Hulda Björg Sáu fram á dapran endi á brúðkaupsferðinni en eftir Frakka-leikinn lyftist heldur á þeim brúnin.

Menntamálaráðherrann Þorgerður Katrín Gunnarsdóttir er á leiðinni til Þýskalands til að styðja við bakið á landsliðinu og fjöldi fólks hefur sett sig í samband við framkvæmdarstjórann í þeirri von að fá miða á leiki liðsins. Aðrir halda heim eftir taugatrekkjandi dvöl í Magdeburg.

Bubbi Stefnir ótrauður á leiki Íslands í milliriðlunum.

Hjónakornin Stefán Friðgeirsson og Hulda Björg Þórisdóttir vöktu mikla athygli í Kastljós-þætti þegar þau sögðust vera á leiðinni í brúðkaupsferð á HM í Þýskalandi. Margir hafa eflaust hugsað hlýlega til þeirra eftir Úkraínu-leikinn þegar möguleikar á framhaldi Íslendinga dvínuðu til muna. „Núna erum við bara á leiðinni til Dortmund og erum ákaflega hamingjusöm að ferðin skyldi ekki fá þennan endi," segir Stefán en hjónakornin íhuguðu alvarlega að fara bara til Spánar ef í harðbakkann slægi. „Sverre Jakobsen, varnartröllið úr landsliðinu, kom að máli við okkur og sagðist vera ákaflega ánægður að geta framlengt brúðkaupsferðina," segir Stefán og hlær. Þau duttu síðan heldur betur í lukkupottinn þegar Alexander Petterson kastaði svitabandi sínu til áhorfenda og þau gripu það með tilþrifum.

Hetjurnar. Landsliðið hefur unnið hug og hjörtu þjóðarinnar með frammistöðu sinni í Þýskalandi.

Stefán og Hulda Björg hafa gistingu út vikuna en verða síðan að treysta á guð og lukkuna. „Stemningin er alveg frábær og það er ótrúlegt að sitja með hundruðum Íslendinga á vellinum og hvetja liðið áfram."
Bubbi Morthens sagði í samtali við Fréttablaðið ekki alls fyrir löngu að hann stefndi út til Þýskalands ef liðið kæmist áfram í milliriðilinn. „Ég er að vinna í þessu," sagði Bubbi þegar Fréttablaðið náði tali af honum en hann eins og flestir aðrir landsmenn sat límdur fyrir framan skjáinn á mánudagskvöldinu.