Lífið

Ari slær í gegn á Facebook

Stefán Þór Hjartarson skrifar
Ari Eldjárn hefur mörg járn í eldinum um þessar mundir og um helgina kom 50 þúsundasti gesturinn á sýningu Mið-Íslands.
Ari Eldjárn hefur mörg járn í eldinum um þessar mundir og um helgina kom 50 þúsundasti gesturinn á sýningu Mið-Íslands. Vísir/Stefán
„Ég er búinn að fá dálítið af viðbrögðum frá fólki sem ég þekki í Finnlandi sem hefur séð fólk vera að deila þessu. Mér finnst þetta mjög skemmtilegt, þetta er orðið tveggja ára gamalt og hefur greinilega farið á eitthvað flakk allt í einu.

Það er líka rosa gaman að lesa kommentin. Fólk virðist fyrst og fremst vera að spá í því sem ég er segja um tungumálin þannig ég upplifi þetta ekkert eins og ég sjálfur sé farinn á eitthvað flakk. Það eru þvílíkar umræður byrjaðar þar sem fólk er mikið að velta fyrir sér af hverju ég minnist ekki á eistnesku líka því hún er svo skyld finnsku og svo eru einhverjir málfræðingar komnir þarna á flug með pælingar sem eru langt fyrir ofan minn skilning,“ segir grínistinn Ari Eldjárn, en myndband með honum að segja brandara hjá Norðurlandaráði hefur farið á töluvert flug á Facebook síðunni Very Finnish problems og er þar komin með hátt í eina og hálfa milljón áhorfa.

„Ég hef svolítið verið að skemmta í Finnlandi og hef farið þangað í þeim tilgangi alla vega tíu sinnum seinustu ár. Ég hef tvisvar farið á frábæra grínhátíð sem heitir Stand Up Turku! og var núna að fá boð um að koma þangað í þriðja skiptið, að því er virðist út af þessu myndbandi. Þannig að þetta er að tryggja mér endurráðningu, í það minnsta,“ segir Ari. 

En hversvegna ætli akkúrat þetta myndband hafi farið á svona mikið flug?

„Kannski er sjaldgæft að það sé búið til grín um Finnland á ensku, ég held að þetta sé yfirleitt Finnar að tala um Finna, þeir eru svo einangraðir eitthvað. En já ég meina, ég heiti Ari og er náfölur, þannig að ég er eiginlega hálfur Finni nú þegar og svo eru Íslendingar með svipað „errr“ og Finnar. Ég á líka góða finnska vini sem hafa hjálpað mér að semja eitthvað af þessu gríni og ber þar helst að nefna Ismo Leikola og André Wickström sem verður einmitt gestur með okkur í Mið-Íslandi í febrúar.“

Það er líka smá grín um Dani þarna í myndbandinu og eitthvað af viðbrögðunum virðist vera komið frá fólki sem hefur búið í Danmörku og talar ekki dönsku en hefur talað ensku við Dani og virðast tengja mjög mikið við það.

En hvað það helsta sem er á döfinni hjá þér?

„Það er Mið-Ísland um hverja helgi næstu mánuði, tónleikar með Sinfó í febrúar og svo ætla ég að koma fram á Edinborgarhátíðinni í ágúst.“

Ætlarðu ekki að verða viral þar líka?

„Ætli það. Það eru svona 4000 uppistandssýningar í gangi þar á sama tíma. Og að ætla að verða viral er held ég alltaf dálítil óskhyggja – svolítið eins og að ætla að semja vinsælt lag. Það er engin leið að vita hvað verður vinsælt á endanum“

Mið-Ísland hefur hafið sýningar á ný, en um síðustu helgi kom 50 þúsundasti gesturinn á sýningu þeirra og var leystur út með fullt fangið af blómum og gjöfum. 






Fleiri fréttir

Sjá meira


×