Innlent

Ánægja með hækkun ellilífeyrisaldursins

Hjörtur Hjartarson skrifar
Formaður félags eldri borgara er ánægður með þær tillögur lífeyrisnefndar um að hækka ellilífeyrisaldurinn um þrjú ár. Að sama skapi segir formaðurinn áfram mikilvægt að tryggja ávöxtunarkröfu hjá lífeyrissjóðunum.

Pétur Blöndal, þingmaður Sjálfstæðisflokksins og formaður lífeyrisnefndar sagði í fréttum okkar í gær að fyrir lægi að tillögur um róttækar breytingar á lífeyriskerfinu yrðu lagðar fram innan nokkurra vikna. Meðal þess sem kom fram var að ellilífeyrisaldurinn yrði hækkaður um þrjú ár.

„Nefndin mun skoða það mjög vandlega og leggja til hugsanlega einhverjar breytingar sem felast á hækkun á ellilífeyrisaldri úr 67 árum í 70 á nokkuð löngu tímabili, þrjátíu árum, eitthvað svoleiðis,“ sagði Pétur.

Þá mun nefndin einnig leggja til ellilífeyrisþegar og öryrkjar verði gert kleift halda út á vinnumarkaðinn í auknu mæli án þess að til skerðingar á lífeyri komi. Formanni félags eldri borgara líst vel á þessar tillögur.

„Jú, vissulega og sérstakleg að fá sveigjanlegan starfslok. Við höfum oft heyrt um það að hluti opinbera starfsmanna myndi gjarnan vilja kannski vinna hálfu ári lengur eða tveimur árum lengur en sjötíu ára markið er bara mjög ákveðið og þá verður fólk að hætta. En á almenna vinnumarkaðinum er þetta ekki alveg eins stíft en samt á sumum stöðum eins og til dæmis í bankakerfinu,“ segir Þórunn Sveinbjörnsdóttir, formaður Félags eldri borgara í Reykjavík.

Þórunn segir það í takt við æ lengri lífaldur Íslendinga að hækka ellilífeyrisaldurinn.

„Við erum náttúrulega hraustari lengur, getum unnið lengur og ég held að hlutavinna á þessum efri árum geti verið mjög áhugaverð. Við heyrum í fólki sem saknar þess virkilega að hafa ekki vinnufélagana,“ segir Þórunn.




Fleiri fréttir

Sjá meira


×