Viðskipti erlent

Alphabet gæti orðið verðmætara en Apple

Sæunn Gísladóttir skrifar
Netrisanum Google var í fyrra skipt upp í nokkur fyrirtæki undir móðurfyrirtækinu Alphabet.
Netrisanum Google var í fyrra skipt upp í nokkur fyrirtæki undir móðurfyrirtækinu Alphabet. nordicphotos/epa
Alphabet, móðurfélag Google, mun kynna afkomu fjórða ársfjórðungs síðasta ár eftir lokun markaða í dag. Ef afkoman er nógu góð gæti hlutabréfaverð Alphabet hækkað nóg til þess að fyrirtækið verði verðmætara en Apple. Alphabet yrði þá verðmætasta fyrirtæki heims.

Sérfræðingar spá því að hagnaður Alphabet muni hækka úr 6,88 dollurum á hlut í 8,10 dollara eftir tilkynninguna og að tekjur muni hækka um 14,7 prósent og nema 20,76 milljörðum dollara, jafnvirði 2.700 milljörðum íslenskra króna, segir í frétt Reuters um málið.

Hlutabréfaverð Alphabet nam 761,35 dollurum við lokun markaðar á föstudaginn og er markaðsvirði fyrirtækisins því um 517 milljarðar dollara, jafnvirði 67.000 milljörðum íslenskra króna. Þetta er einungis 4,4 prósent lægra en markaðsvirði Apple sem nemur 540 milljörðum dollara, jafnvirði 70.300 milljörðum íslenskra króna.






Fleiri fréttir

Sjá meira


×