Handbolti

Alexander: Óli hefur komið inn með skemmtilega hluti fyrir mótið

Henry Birgir Gunnarsson skrifar
Alexander Petersson.
Alexander Petersson. Vísir/Ernir
Alexander Petersson verður í takmörkuðu hlutverki hjá íslenska landsliðinu á EM í Póllandi. Þessi mikli harðjaxl mun bíta á jaxlinn og gera það sem hann getur til þess að hjálpa liðinu.

„Ég er aðeins verri núna en ég er venjulega,“ segir landsliðsmaðurinn Alexander Petersson en hann hefur verið þjakaður af meiðslum síðustu ár en ætlar engu að síður að hjálpa landsliðinu á EM í Póllandi.

„Þetta eru meiðsli í fæti sem hafa verið að plaga mig síðustu fjóra mánuði. Ég þarf á hvíld að halda til þess að losna við þessi meiðsli en það er enginn tími til þess að slaka á,“ segir Alexander og brosir. „Læknarnir segja að ég þurfi að hvíla algjörlega í sex til átta vikur. Ég finn þann tíma þegar ég er hættur í handbolta.“

Tekur miklu færri skot en áður



Öxlin hefur einnig verið að plaga Alexander síðustu ár og hann hefur einfaldlega þurft að venjast því að spila með verki í öxlinni.

„Ég hef þurft að stýra álaginu. Taka kannski fimm til sex skot í leik í staðinn fyrir að taka fimmtán. Ég er ekki ungur lengur,“ segir hinn 35 ára gamli Alexander en hvað hefur hann eiginlega verið að spila með verki lengi?

„Það er orðinn ansi langur tími,“ segir Alexander og þarf að hugsa sig vandlega um er hann rifjar upp hvenær hann spilaði síðast handbolta verkjalaus.

„Ég var verkjalaus er ég fór til Füchse Berlin árið 2010. Svo kom stórmót í janúar og þá meiddist ég á öxlinni. Ég hef ekki verið samur síðan. Ég er búinn að venjast þessum axlarmeiðslum en það er ómögulegt að segja hvað ég get haldið lengi áfram svona.“

Miðað við meiðslasögu Alexanders þá áttu margir von á því að hann myndi ekki gefa kost á sér í verkefnið í Póllandi. Hann missti af HM 2014 og EM 2014 en annars hefur hann verið með á öllum mótum síðustu árin. Alexander segir að hann verði líklega ekki í aðalhlutverki að þessu sinni.

Vísir/EPA
Spila 15 mínútur í leik

„Við erum að tala núna um að láta mig spila í hverjum einasta leik en ekki mikið samt. Ætli ég spili ekki svona fimmtán mínútur í leik. Kannski stundum bara vörn en við verðum að sjá til hvernig þetta þróast hjá okkur,“ segir Alexander sem oftar en ekki hefur lent í því að þurfa að spila mun meira en hann kannski ætlaði sér.

„Ég var stundum beðinn um að hjálpa til en endaði svo í því að spila heilan leik. Það fór ekkert allt of vel með mig,“ segir Alexander og leyfir sér samt að hlæja er hann rifjar þetta upp.

Sama hvað gengur á þá eru strákarnir okkar alltaf bjartsýnir áður en þeir leggja af stað á stórmót. Á því er engin breyting núna.

Vísir/Ernir
Hefur góða tilfinningu fyrir EM

„Mér líst mjög vel á liðið og þetta lítur vel út. Við erum með gott lið og strákarnir í góðu formi. Menn eins og Rúnar og Ásgeir líta mjög vel út og eru með mikið sjálfstraust. Yngri strákarnir eru líka efnilegir og markverðirnir í góðu standi. Ég vil ekki vera með of miklar yfirlýsingar fyrir mót en ég hef góða tilfinningu fyrir þessu móti,“ segir Alexander en strákarnir þurfa að ná góðum árangri ef þeir ætla að ná því markmiði sínu að komast í forkeppni Ólympíuleikanna.

„Óli [Ólafur Stefánsson aðstoðarþjálfari] hefur komið inn með skemmtilega hluti fyrir mótið en þó svolítið spes líka. Við gætum komið mótherjanum á óvart. Það er gaman að breyta aðeins til. Það er ómögulegt að segja hvað við förum langt en það er mikilvægt að byrja vel. Ekki tapa strax í byrjun eins og svo oft áður og reyna að bjarga sér gegn sterkustu liðunum.“


Tengdar fréttir

Guðjón Valur: Dagarnir misjafnir eins og hjá öllum öðrum

Landsliðsfyrirliðinn Guðjón Valur Sigurðsson segir að það séu alltaf forréttindi að fá að spila fyrir hönd Íslands og að leikmenn liðsins séu ákveðnir í að standast pressuna sem íslenska þjóðin setur á liðið.




Fleiri fréttir

Sjá meira


×