Handbolti

Álaborg vann toppslaginn | Erfitt hjá okkar mönnum í Frakklandi

Henry Birgir Gunnarsson skrifar
Aron er að gera flotta hluti með lið Álaborgar.
Aron er að gera flotta hluti með lið Álaborgar. mynd/álaborg
Álaborg er enn á toppi dönsku úrvalsdeildarinnar eftir sterkan 28-24 sigur á Bjerringbro-Silkeborg í toppslag deildarinnar í kvöld.

Tveimur stigum munaði á liðunum fyrir kvöldið og Álaborg er nú með fjögurra stiga forskot í deildinni. Aron Kristjánsson þjálfar liðið og með því leika Arnór Atlason, Janus Daði Smárason og Stefán Rafn Sigurmannsson.

Íslendingaliðið Nimes steinlá er það sótti Frakklandsmeistara PSG heim í kvöld. Lokatölur þar 37-23.

Snorri Steinn Guðjónsson skoraði þrjú mörk fyrir Nimes úr átta skotum. Ásgeir Örn Hallgrímsson tók fjögur skot í kvöld en ekkert þeirra fór í netið.

Mikkel Hansen skoraði sex mörk fyrir PSG og Uwe Gensheimer fimm.

Íslendingarnir í Cesson-Rennes urðu einnig að sætta sig við tap er þeir heimsóttu Chambery. Lokatölur þar 27-25.

Guðmundur Hólmar Helgason skoraði fimm mörk úr tíu skotum fyrir Cesson-Rennes og Geir Guðmundsson skoraði eitt mark úr fjórum skotum.

Nimes er í sjötta sæti frönsku úrvalsdeildarinnar en Cesson-Rennes því tólfta.




Fleiri fréttir

Sjá meira


×