Ákærðir fyrir tilraun til manndráps en neita sök
Ákærðu heita Kristján Halldór Jensson, 31 árs, Axel Már Smith, 33 ára og Tómas Pálsson Eyþórsson, 25 ára. Þeir hafa allir setið í gæsluvarðhaldi á grundvelli almannahagsmuna frá því grunur féll á þá, hafði Fréttablaðið eftir Margréti Unni Rögnvaldsdóttur aðstoðarsaksóknari í gær. Málið tengist uppgjöri vegna fíkniefnamála en þremenningarnir mæltu sér mót við mennina tvo sem voru í bílnum sem skotið var á til að gera upp ágreining um skuld annars þeirra við Tómas, að því er fram kemur í ákæru.
Kristján játar vopnalagabrot sem hann er ákærður fyrir en Tómas neitar sömu sök. Axel Már játar síðan fíkniefnalagabrot sem hann er ákærður fyrir. Mikill viðbúnaður var hjá lögreglu í dómsalnum og voru mennirnir færðir inn í salinn í járnum af fjórum lögreglumönnum.
Mennirnir hittust að kvöldi föstudagsins 18. nóvember á bílastæðinu við bílasöluna Höfðahöllina við Tangarbryggju í Reykjavík. Fram kemur í ákærunni að þar hafi árásarmennirnir farið úr bílnum og gengið að bíl fórnarlambanna, og að Tómas hafi sparkað í bílinn. Ökumaður bílsins bakkaði til að reyna að komast undan mönnunum, og skaut þá Kristján úr haglabyssu að framhluta bílsins en hitti ekki, samkvæmt lýsingu á atburðunum í ákærunni. Fórnarlömbin óku á brott, og veittu þremenningarnir þeim eftirför á sínum bíl. Á hringtorginu við Bíldshöfða skaut Kristján öðru skoti út um glugga bílsins. Í þetta skiptið hæfði hann bíl fórnarlambanna, með þeim afleiðingum að afturrúðan splundraðist og miklar skemmdir urðu á bílnum. Brot úr hagli hafnaði meðal annars í aftursætis bílsins.
Fórnarlömbin keyrðu eftir árásina á lögreglustöðina við Hverfisgötu og veittu árásarmennirnir þeim ekki frekari eftirför. Lögreglan handtók Tómas sama kvöld, og fann við leit í bíl hans úðavopn og kylfu. Við húsleit hjá Kristjáni fundust fjögur úðavopn. Fórnarlömb mannanna krefjast þess að þeir verði dæmdir til að greiða hvorum mannanna 1,2 milljónir króna í miskabætur.
Aðalmeðferð í málinu fer fram 5. og 6. mars næstkomandi.
- Fréttir
- Sport
- Viðskipti
- Lífið
Fréttir eftir mánuði
Hér má finna fréttir eftir mánuði.
- Sími 512 5000
- Hafðu samband
- Starfsfólk
- Umferð
- Veftré
- Auglýsingar
- 365 Skaftahlíð 24 105 Reykjavík Sími: 512 5000